شہباز شریف کی تاجک صدرسےملاقات،دو طرفہ تعاون بڑھانے پراتفاق

وزیراعظم شہباز شریف نے تاجکستان کے صدر امام علی رحمٰن سے ملاقات کی، مختلف شعبوں میں تعاون پر تبادلہ خیال کیاگیا۔
دوشنبے میں وزیراعظم شہباز شریف اور تاجک صدر امام علی رحمٰن کے درمیان ملاقات میں وزیراعظم نے تاجک صدر کو جنوبی ایشیا کی صورتحال سے آگاہ کیا۔

وزیراعظم شہباز شریف نے کہا کہ پاکستان کے خلاف بھارتی جارحیت جنگی اقدام تھا، عالمی برادری غیرذمہ دارانہ رویے پر بھارت سے جواب طلب کرے۔پاکستان خطے میں امن چاہتا ہے لیکن اپنی علاقائی خودمختاری اور سالمیت کا ہر قیمت پر تحفظ کریں گے۔

وزیراعظم نے مسئلہ کشمیر کے حوالے سے کہا کہ خطے میں امن کیلئے کشمیر کے دیرینہ مسئلے کا حل ناگزیر ہے، سلامتی کونسل کی قراردادوں کے مطابق مسئلہ شمیر حل کرنا ہوگا۔جولائی 2024کےدورہ تاجکستان میں دوطرفہ تعلقات کی بنیاد رکھی۔وسط ایشیائی ممالک کے ساتھ روابط کے فروغ کیلئے پرعزم ہیں اور سی پیک کو وسطی ایشیا تک توسیع دینا چاہتےہیں۔

تاجک صدر امام علی رحمٰن نے وزیراعظم پاکستان سے ملاقات کے دوران کہا کہ پاکستان ہمارا بااعتماد دوست ہے، خطے میں امن اور استحکام کے حامی ہیں۔امن اور استحکام کیلئے شہبازشریف کا قائدانہ کردار قابل تعریف ہے،تاجک صدر نے پاکستان سےمختلف شعبوں میں تعاون کو فروغ دینے کے عزم کا اعادہ کیا۔

قبل ازیں وزیراعظم شہباز شریف 3 روزہ دورہ آذربائیجان مکمل کرکےدو روزہ دورے پر تاجکستان پہنچ گئے، دوشنبہ ایئرپورٹ پر تاجک ہم منصب نے ان کا استقبال کیا۔