نائیجیریا :طوفانی بارشوں کے بعد سیلاب نے تباہی مچادی، 120 سے زائد افراد ہلاک

ابوجا: افریقی ملک نائیجریا میں موسلا دھار طوفانی بارشوں کے بعد آنے والے سیلاب نے تباہی مچا دی، جس کے نتیجے میں اب تک 120 سے زائد افراد ہلاک جبکہ کئی ہزار افراد بے گھر ہو چکے ہیں۔
غیر ملکی میڈیا کے مطابق وسطی نائیجیریا کے مختلف علاقوں میں شدید بارشوں کے بعد سیلاب نے نظام زندگی درہم برہم کردی اور کم از کم 120 کے قریب افراد ہلاک ہوگئے جبکہ یہ تعداد مزید بڑھنے کا خدشہ ہے۔ 

رپورٹ کے مطابق یہ ہولناک سیلاب بدھ کی رات سے جمعرات کی صبح تک ہونے والی موسلادھار بارشوں کے باعث آیا، جس نے ریاست نائیجر کے کنارے واقع شہر موکوا اور آس پاس کے علاقوں میں تباہی مچائی۔
ریاست نائیجر کے ایمرجنسی مینجمنٹ ایجنسی کے سربراہ ابراہیم حسینی نے بتایا کہ جمعرات کو ہونے والی ہلاکتوں کے مقابلے میں آج اموات کی تعداد بہت زیادہ ہے، انہوں نے مزید کہا کہ شمالی وسطی ریاست میں دو کمیونٹیز میں تقریباً 3 ہزار مکانات زیر آب آگئے۔
واضح رہے کہ 2022 میں نائیجیریا میں بدترین سیلاب آیا تھا، جس میں 600 سے زائد افراد ہلاک، اور تقریباً 14 لاکھ افراد بے گھر ہو گئے تھے جبکہ 4 لاکھ 40 ہزار ہیکٹر کھیتی کو تباہ کر دیا۔