آئی سی سی ٹیسٹ رینکنگ: پاکستانی بیٹرز ٹاپ 10 سے باہر، جو روٹ سرفہرست

آئی سی سی نے ٹیسٹ بیٹرز کی نئی رینکنگ جاری کر دی ہے، جس میں ٹاپ 10 کھلاڑیوں میں کوئی پاکستانی شامل نہیں ہے۔

رینکنگ کے مطابق انگلینڈ کے جو روٹ بدستور پہلے نمبر پر براجمان ہیں، جبکہ بھارت کے ریشبھ پنت ایک درجہ ترقی کے بعد چھٹے نمبر پر آ گئے ہیں۔ آسٹریلیا کے ٹریوس ہیڈ نے تین درجے بہتری کے ساتھ ٹاپ 10 میں جگہ بناتے ہوئے دسویں پوزیشن حاصل کر لی ہے۔

پاکستان کی جانب سے سعود شکیل ایک درجہ تنزلی کے بعد 11ویں نمبر پر آ گئے ہیں، جبکہ محمد رضوان تین درجے نیچے آ کر 19ویں نمبر پر پہنچ گئے ہیں۔

ٹیسٹ بولرز کی درجہ بندی میں بھارت کے جسپریت بمرا پہلی پوزیشن پر برقرار ہیں، جنوبی افریقا کے کگیسو ربادا دوسرے، اور آسٹریلیا کے پیٹ کمنز تیسرے نمبر پر ہیں۔ پاکستان کے اسپنر نعمان علی ایک درجہ تنزلی کے بعد پانچویں نمبر پر چلے گئے ہیں۔

آل راؤنڈرز کی فہرست میں بھارت کے رویندرا جڈیجا بدستور سرفہرست ہیں۔