سیلاب سے بچاؤ کے لیے پیشگی اقدامات یقینی بنائیں، وزیراعظم شہباز شریف کی ہدایت

وزیراعظم محمد شہباز شریف نے ہدایت کی ہے کہ مون سون کی بارشوں کے دوران عوام کو سیلابی خطرات سے محفوظ رکھنے کے لیے پیشگی اقدامات کیے جائیں۔

یہ ہدایات انہوں نے گورنر خیبرپختونخوا فیصل کریم کنڈی سے اسلام آباد میں ہونے والی اہم ملاقات کے دوران دیں، جس میں گورنر نے سوات میں حالیہ افسوسناک واقعے پر تفصیلی بریفنگ دی۔

گورنر خیبرپختونخوا نے وزیراعظم کو دریائے سوات میں پیش آنے والے سانحے سے متعلق آگاہ کیا، جس پر وزیراعظم نے قیمتی انسانی جانوں کے ضیاع پر گہرے رنج و افسوس کا اظہار کیا۔ وزیراعظم نے متعلقہ اداروں کو ہدایت کی کہ وہ ایسے واقعات کی روک تھام کے لیے اپنی استعداد کار میں اضافہ کریں۔

ملاقات کے دوران ملک کی مجموعی صورت حال پر بھی تبادلہ خیال کیا گیا۔

اس موقع پر وفاقی وزیر برائے کشمیر و گلگت بلتستان انجینئر امیر مقام، وفاقی وزیر برائے پبلک افیئرز رانا مبشر اقبال، وزیراعظم کے مشیر برائے سیاسی امور رانا ثناء اللہ، وزیرِ مملکت برائے پاور عبدالرحمان کانجو اور معاونِ خصوصی برائے سیاسی امور طلحہ برکی بھی موجود تھے۔