ٹرمپ کی جنگ بندی تجویز پر غور کریں گے، فیصلہ تفصیلات دیکھ کر ہو گا: حماس

حماس نے کہا ہے کہ غزہ میں جنگ بندی کے لیے امریکی سابق صدر ڈونلڈ ٹرمپ کی جانب سے پیش کی گئی 60 روزہ جنگ بندی تجویز کا تفصیلی جائزہ لینے کے بعد ہی کوئی حتمی فیصلہ کیا جائے گا۔

ترجمان حماس کے مطابق، جنگ بندی کی اس نئی تجویز کی تفصیلات ثالثوں کے ذریعے تنظیم تک پہنچ چکی ہیں۔
حماس کے سینئر رہنما طاہر النونو نے بیان میں کہا کہ اگر کوئی بھی تجویز جنگ کے مکمل خاتمے کا راستہ فراہم کرتی ہے، تو ہم اسے سنجیدگی سے پرکھیں گے اور قبول کرنے پر آمادہ ہوں گے۔

انہوں نے مزید بتایا کہ حماس کے نمائندے قاہرہ میں مصری اور قطری ثالثوں سے ملاقات کریں گے تاکہ باقی ماندہ اختلافات کو کم کیا جا سکے اور مذاکرات کی بحالی ممکن بنائی جا سکے۔

حماس کے ترجمان نے ساتھ ہی یہ بھی واضح کیا کہ ماضی میں اسرائیل نے کئی مرتبہ یک طرفہ طور پر جنگ بندی معاہدوں کی خلاف ورزی کی، جس سے اعتماد کو نقصان پہنچا۔ تاہم اگر عالمی طاقتیں اسرائیل کی جانب سے اس بار سنجیدہ ضمانت فراہم کریں، تو حماس اپنی شرائط کے تحت اس تجویز پر غور کے لیے تیار ہے۔

یاد رہے کہ سابق امریکی صدر ڈونلڈ ٹرمپ نے حالیہ بیان میں دعویٰ کیا تھا کہ اسرائیل 60 دن کی جنگ بندی پر آمادہ ہو چکا ہے، اور حماس کو یہ موقع ضائع نہیں کرنا چاہیے، ورنہ نتائج سنگین ہو سکتے ہیں۔