ہائیکورٹ معروف فلم ساز جامی کی سزا معطل کردی، ضمانت پر رہا کرنے کا حکم

کراچی:  سندھ ہائیکورٹ نے معروف فلم ساز اور رائٹر جمشید محمود عرف جامی کی سزا کے خلاف دائر اپیل پر سماعت کے دوران ان کی ضمانت منظور کرتے ہوئے سزا کو معطل کر دیا ہے۔

تفصیلات کے مطابق سندھ ہائی کورٹ میں جمشید محمود عرف جامی کی درخواستِ ضمانت پر سماعت ہوئی،دوران سماعت عدالت نے جمشید محمود عرف جامی کو 50 ہزار روپے کے مچلکے جمع کروانے کا حکم دیتے ہوئے ضمانت منظور کر لی۔

عدالت نے حکم دیا کہ جامی 50 ہزار روپے کے مچلکے جمع کرائیں، جس کے بعد انہیں آج ہی جیل سے رہا کیا جائے گا۔

اس موقع پر فلم ساز جمشید محمود جامی کے وکیل حافظ محمد ایڈووکیٹ کے مطابق عدالت کا فیصلہ ان کے مؤکل کے لیے بڑی ریلیف ہے۔

جامی کی جانب سے دائر کی گئی اپیل میں مؤقف اختیار کیا گیا کہ ان پر لگائے گئے الزامات غلط اور بے بنیاد ہیں۔ جس جرم میں سزا دی گئی وہ قابلِ ضمانت ہے۔

خیال رہے کہ جمشید جامی کے خلاف فلم، میوزک ڈائریکٹر سہیل جاوید نے ڈائریکٹ کمپلین دائر کی تھی جس پر ایڈیشنل ڈسٹرکٹ اینڈ سیشن جج جنوبی نے جمشید محمود عرف جامی کو 2 سال قید اور 10 ہزار روپے جرمانے کی سزا سنائی تھی۔

ماتحت عدالت نے اپنے تحریری فیصلے میں لکھا تھا کہ ملزم نے شکایت کنندہ کے خلاف سماجی رابطوں کی ویب سائٹ پر غیر محتاط رویہ اپنایا، ملزم توہین آمیز مواد کی تردید اور خود کو علیحدہ رکھنے میں بھی ناکام رہا۔