بیروت اور جنوبی لبنان پر اسرائیلی فضائیہ کی بمباری، 31 جاں بحق،درجنوں زخمی

بیروت: اسرائیل نے حزب اللہ کے خلاف باقاعدہ ’جارحانہ مہم‘ شروع کرنے کا اعلان کرتے ہوئے بیروت اور جنوبی لبنان میں شدید فضائی بمباری کی ہے جس کے نتیجے میں 31 افراد جاں بحق جبکہ سو سے زائد زخمی ہو چکے ہیں۔

غیر ملکی میڈیا رپورٹس کے مطابق اسرائیلی فوج کے سربراہ ایال زمیر نے ایک اجلاس میں کہا کہ حزب اللہ کی جانب سے راکٹ حملوں کے بعد اسرائیل نے یہ کارروائی شروع کی ہے۔

لبنانی وزارت صحت کے مطابق اسرائیل کے جارحانہ حملوں میں کم از کم 31 افراد شہید ہو گئے ہیں جبکہ 149 افراد زخمی ہیں، اسرائیل نے 50 علاقوں میں انتباہ جاری کیا ہے۔

میڈیا رپورٹس کے مطابق اسرائیلی میڈیا نے دعویٰ کیا ہے کہ اسرائیل کے حملوں میں حزب اللہ رہنما محمد رعد شہید ہو گئے ہیں، محمد رعد حزب اللہ کے پارلیمانی دھڑے کےسربراہ تھے۔

خیال رہے کہ لبنان کے دارالحکومت بیروت میں صبح دھماکوں کی آوازیں سنائیں دیں، اس سے قبل ایرانی حمایت یافتہ حزب اللہ نے شمالی اسرائیل میں راکٹ داغے تھے، حزب اللہ نے اسے سپریم لیڈر کی شہادت کا بدلہ قرار دیا۔