کئی روز کے مسلسل اضافے کے بعد سونے کی قیمتوں میں نمایاں کمی

کراچی: عالمی و مقامی مارکیٹوں میں کئی روز کےمسلسل اضافے کے بعد سونے کی قیمتوں میں نمایاں کمی ریکارڈ کی گئی۔

آل پاکستان جیمز اینڈ جیولر زایسوسی ایشن کے مطابق کاروباری ہفتے کے دوسرے روز مقامی مارکیٹوں میں فی تولہ سونا 13 ہزار 900 روپے کمی کے بعد سستا ہوگیا،ایک تولہ سونا سستا ہوکر 5 لاکھ 49 ہزار 962 روپے کی سطح پر آگیا۔

ایسوسی ایشن کے مطابق اسی طرح10 گرام سونا سستا ہو کر 4 لاکھ 71 ہزار 503 روپے پر پہنچ گیا اس کے علاوہ  فی تولہ چاندی سستی ہوکر 8 ہزار 904 روپے کی کم سطح تک آگئی۔

دوسری جانب عالمی بلین مارکیٹ میں سونا 139 ڈالر سستا ہو کر 5272 ڈالر فی اونس ہوگیا۔

خیال رہے کہ گزشتہ روز سونے کی قیمتوں میں بڑا اضافہ ہوا،عالمی مارکیٹ میں سونا 133 ڈالر مہنگا ہوکر 5411 ڈالر فی اونس پر پہنچ گیاتھا،مقامی صرافہ مارکیٹ میں ایک تولہ سونا 13300 روپے مہنگا ہواجس کے بعد ایک تولہ سونے کی قیمت 5 لاکھ 63 ہزار862 روپے پر پہنچ گئی تھی۔