فورسزکی افغان طالبان کے خلاف مؤثر جوابی کارروائیاں،جلال آباد اورننگرہار میں سٹوریج سائٹس تباہ

اسلام آباد:سیکیوررٹی ذرائع کے مطابق افغان طالبان کے خلاف مؤثر جوابی کارروائیاں جاری ہیں۔ بھرپور فضائی حملے کے نتیجے میں جلال آباد میں ایمونیشن ڈیپو اور ڈرونز سٹوریج کو تباہ کر دیا گیا۔

سکیورٹی ذرائع کا کہنا ہے کہ افغان طالبان کی جارحیت کے جواب میں پاک افواج کی مؤثر اور تباہ کن کارروائیوں کے باعث دشمن کو بھاری نقصان کا سامنا ہے۔ فورسز ہر قسم کی جارحیت کا منہ توڑ جواب دینے کیلئے پُرعزم ہیں۔

ذرائع کے مطابق ننگرہار میں کامیاب فضائی کارروائی کے دوران خوگانی بیس کو بھی تباہ کر دیا گیا۔ افغان طالبان اور فتنہ الخوارج کو بلا اشتعال جارحیت کے بعد ہر محاذ پر پسپائی کا سامنا ہے۔سیکیورٹی ذرائع نے مزید بتایا کہ آپریشن غضب للحق اپنے مقررہ اہداف کے حصول تک جاری رہے گا۔

خیال رہے کہ جمعرات 26 فروری کی رات پاک افغان سرحد پر افغان طالبان کی جانب سے بلا اشتعال جارحیت کے جواب میں پاکستان کی مسلح افواج کا آپریشن غضب للحق جاری ہے۔

پاک فوج نے افغانستان کی حدود کے اندر مختلف مقامات پر جوابی کارروائیاں کیں اور کابل، قندھار اور پکتیا سمیت دیگر مقامات پر موجود عسکری تنصیبات کو نشانہ بنایا اور کئی چیک پوسٹیں تباہ کیں۔