پاک بھارت کشیدگی،ڈونلڈ ٹرمپ کا پہلی بار 5بھارتی جہاز گرائے جانے کا اعتراف

واشنگٹن: امریکی صدر ڈونلڈ ٹرمپ نے بھارتی جھوٹوں سے پردہ اٹھاتے ہوئے جنگ کے دوران پاک فضائیہ کے ہاتھوں بھارتی جنگی طیاروں کی تباہی کا اعتراف کر لیا۔ 

تفصیلات کے مطابق امریکی صدر ڈونلڈ ٹرمپ نے وائٹ ہاؤس میں تقریب سے خطاب کرتے ہوئے کہا کہ پاکستان نے بھارت کے 5سے 6طیارے گرائے، دنیا کی کئی جنگیں روکنے پر فخر ہے، پاکستان اور بھارت کے درمیان خطرناک جنگ کا خاتمہ کیا۔

امریکی صدر ڈونلڈ ٹرمپ نے ری پبلکن سینیٹرزکے اعزازمیں استقبالیہ سے خطاب کرتے ہوئےاعتراف کیا ہے کہ پاکستان اور بھارت کے درمیان کشیدہ صورتحال کے دوران پاک فضائیہ نے 5 بھارتی جنگی طیارے مارگرائے گئے تھے۔

اپنے خطاب کے دوران صدر ٹرمپ نے انڈیا پاکستان کشیدگی کا ذکر کرتے ہوئے کہا کہ درحقیقت طیارے فضا میں مار گرائے جا رہے تھے، پانچ پانچ، چار یا پانچ، لیکن میرا خیال ہے کہ پانچ طیارے واقعی مار گرائے گئے تھے۔‘

انہوں نے کہا کہ پاک بھارت جنگ میں حالات انتہائی خراب تھے اور دونوں ایٹمی ریاستیں ایک خطرناک تصادم کے دہانے پر پہنچ چکی تھیں۔

صدر ٹرمپ نے ایک دفعہ پھر جنگ بندی کا کریڈٹ لیتے ہوئے کہا کہ میں نے ذاتی طورپرسفارتی مداخلت کرتے ہوئے جنگ رکوا کردنیا کو ایٹمی تباہی سے بچایا اور مجھے فخر ہے کہ میں نے دنیا بھر میں کئی جنگیں روکنے میں کردارادا کیا۔

یہ بیان بھارتی مؤقف پر ایک بڑا سوالیہ نشان بن گیا ہے جبکہ پاکستان کے مؤقف کی عالمی سطح پرتصدیق ہو گئی۔

خیال رہے کہ پاکستان کی جانب سے بھارتی طیارے مار گرائے جانے کی تصدیق عالمی معتبر جریدوں سمیت رافیل بنانے والی واے کمپنی،انڈین چیف آف ڈیفنس اسٹاف ،بھارتی فضائیہ کے چیف ائیر مارشل اے کے بھارتی بھی کر چکے ہیں۔

تا ہم اس حوالے سے بھارتی حکام نے طیاروں کی درست تعداد نہیں بتائی، تاہم آج امریکی صدر نے ایک دفعہ پھر پاکستانی دعوے کی تصدیق کرتے ہوئے پاک فضائیہ کے ہاتھوں بھارتی جنگی طیاروں کی تباہی کا اعتراف کیا۔