ایشیا کپ کا تنازع شدت اختیار کر گیا، بھارت کی بائیکاٹ کی دھمکیاں

بھارت نے ایشین کرکٹ کونسل (اے سی سی) کے صدر محسن نقوی کے آئی سی سی کے سالانہ اجلاس میں ذاتی طور پر شرکت نہ کرنے پر ایشیا کپ کے مکمل بائیکاٹ کی دھمکیاں دینا شروع کر دی ہیں۔

ذرائع کے مطابق محسن نقوی سنگاپور میں ہونے والے آئی سی سی اجلاس میں فزیکل شرکت کے بجائے آن لائن شرکت کریں گے۔ یہ اجلاس انٹرنیشنل کرکٹ کونسل کے چیئرمین جے شاہ کی زیرِ صدارت پہلا سالانہ اجلاس ہے۔

دوسری جانب محسن نقوی نے ایشیا کپ سے متعلق ایک اہم اجلاس ڈھاکا میں طلب کیا ہے، جس پر بھارتی میڈیا کا دعویٰ ہے کہ بھارت سمیت عمان، سری لنکا اور افغانستان اجلاس کا بائیکاٹ کریں گے۔ ان ممالک کی غیر حاضری میں ہونے والے فیصلوں کو "غیر مؤثر" قرار دیا جا رہا ہے۔

بھارتی موقف ہے کہ ایشیا کپ تبھی ممکن ہوگا جب اجلاس کا مقام تبدیل کیا جائے۔ تاہم، ذرائع کے مطابق اے سی سی صدر محسن نقوی اجلاس کا وینیو تبدیل کرنے پر آمادہ نہیں اور اپنے فیصلے پر قائم ہیں۔

اے سی سی کی جانب سے تمام رکن ممالک کو آن لائن شرکت کا آپشن بھی فراہم کیا گیا ہے تاکہ کوئی ملک اجلاس سے مکمل طور پر باہر نہ رہے۔