خیبرپختونخوا: اپوزیشن کا سینیٹ انتخابات میں امیدوار دستبردار نہ کرانے کا فیصلہ

خیبرپختونخوا میں سینیٹ انتخابات کے حوالے سے اپوزیشن جماعتوں نے 21 جولائی کو ہونے والے انتخاب میں اپنے امیدواروں کو کسی صورت دستبردار نہ کرانے کا فیصلہ کیا ہے۔

یہ فیصلہ گورنر خیبرپختونخوا فیصل کریم کنڈی کی زیر صدارت گورنر ہاؤس پشاور میں اپوزیشن جماعتوں کے ایک مشترکہ اجلاس میں کیا گیا۔ اجلاس میں متفقہ طور پر طے پایا کہ اپوزیشن سینیٹ انتخابات میں پوری قوت کے ساتھ حصہ لے گی اور کسی بھی امیدوار کو انتخابی دوڑ سے باہر نہیں کیا جائے گا۔

اجلاس میں "5 اور 6" کے فارمولے پر عمل درآمد جاری رکھنے پر بھی اتفاق کیا گیا، جو کہ صوبائی حکومت اور اپوزیشن کے درمیان پہلے سے طے شدہ ایک سیاسی سمجھوتہ ہے۔

اجلاس میں جمعیت علمائے اسلام (ف) کے سینیئر رہنما سینیٹر مولانا عطا الرحمٰن، خیبرپختونخوا اسمبلی میں اپوزیشن لیڈر ڈاکٹر عباد، پیپلز پارٹی کے پارلیمانی لیڈر احمد کنڈی اور دیگر اپوزیشن جماعتوں کے نمائندگان و امیدواران شریک ہوئے۔

شرکاء نے سینیٹ انتخابات کی موجودہ صورت حال کا تفصیلی جائزہ لیا اور آئندہ کی حکمت عملی پر غور کیا۔