چکوال میں شدید بارشیں: انفرا اسٹرکچر تباہ، رابطہ پل سیلاب میں بہہ گئے

پنجاب کے ضلع چکوال میں حالیہ شدید بارشوں کے باعث بنیادی ڈھانچہ بری طرح متاثر ہوا ہے۔ ذرائع کے مطابق، چکوال میں 450 ملی میٹر بارش ریکارڈ کی گئی جس کے نتیجے میں 32 سڑکیں مکمل طور پر تباہ ہو گئیں جبکہ سیلابی ریلے متعدد رابطہ پلوں کو بہا لے گئے۔

سڑکوں کی تباہی کے باعث کئی دیہی اور شہری علاقوں کا زمینی رابطہ منقطع ہو گیا ہے، جس سے آمدورفت میں شدید مشکلات پیش آ رہی ہیں۔ تاہم، انتظامیہ کی جانب سے بند راستے کھولنے کے لیے ہیوی مشینری متاثرہ علاقوں میں پہنچا دی گئی ہے۔

بارشوں کے دوران بجلی کا نظام بھی درہم برہم ہو گیا۔ متعدد علاقوں میں بجلی کی فراہمی معطل ہو چکی ہے، تاہم واپڈا حکام نے بجلی کی بحالی کے لیے مرمتی کام کا آغاز کر دیا ہے۔

دریں اثنا، کلرکہار-چکوال روڈ پر لینڈ سلائیڈنگ کے باعث بند ہونے والا راستہ کلیئر کر دیا گیا ہے۔

پنجاب کی وزیر اعلیٰ مریم نواز نے صورتِ حال کا جائزہ لینے کے لیے آج چکوال کا دورہ کرنے کا اعلان کیا ہے، جہاں وہ متاثرہ علاقوں میں ریلیف اور بحالی کے اقدامات کا مشاہدہ کریں گی۔