بھارت میں نیہا کے نام سے رہنے والا بنگلادیشی شہری گرفتار، 20 سال بعد اصلیت بے نقاب

بھارت میں کئی سال تک ٹرانسجینڈر خاتون "نیہا" کے نام سے زندگی گزارنے والے بنگلادیشی شہری عبدالکلام کو پولیس نے ایک خفیہ آپریشن کے دوران گرفتار کر لیا۔

بھارتی میڈیا کے مطابق عبدالکلام 10 سال کی عمر میں غیر قانونی طور پر بنگلادیش سے بھارت آیا تھا اور ابتدائی طور پر ممبئی میں مقیم رہا، جہاں وہ تقریباً 20 سال تک رہا۔ بعدازاں وہ بھوپال منتقل ہو گیا اور وہاں خود کو ایک ٹرانسجینڈر خاتون کے طور پر "نیہا" کے نام سے رجسٹر کروایا۔

عبدالکلام نے نہ صرف مقامی خواجہ سرا کمیونٹی میں اپنی شناخت بنا لی، بلکہ ایک بھارتی شہری کے طور پر متعدد سرکاری دستاویزات بھی حاصل کر لیں، جن میں راشن کارڈ، ووٹر آئی ڈی اور پاسپورٹ شامل تھے۔ پولیس کے مطابق اُس نے بھارتی پاسپورٹ کے ذریعے کئی بار بنگلادیش کا سفر بھی کیا، مگر اس دوران اس پر کسی کو شبہ نہیں ہوا۔

پولیس نے عبدالکلام کو خفیہ معلومات کی بنیاد پر گرفتار کیا ہے۔ اس پر غیر قانونی داخلہ، جعلسازی، اور بھارت کی قومی سلامتی کو خطرے میں ڈالنے جیسے سنگین الزامات کے تحت مقدمہ درج کیا گیا ہے، جبکہ تفتیش کا عمل جاری ہے۔