سعودی شہزادہ الولید بن خالد 20 سال کومہ میں رہنے کے بعد انتقال کر گئے

ریاض: سعودی شہزادہ الولید بن خالد بن طلال طویل عرصے تک کومہ میں رہنے کے بعد 38 برس کی عمر میں انتقال کر گئے۔ شہزادہ الولید 2005 میں برطانیہ میں دورانِ تعلیم ایک ٹریفک حادثے کا شکار ہوئے تھے، جس میں سر پر شدید چوٹ آنے کے باعث وہ مسلسل کوما میں چلے گئے تھے۔

عرب میڈیا کے مطابق وہ گزشتہ دو دہائیوں سے ریاض کے کنگ فیصل اسپتال میں زیر علاج تھے، جہاں ان کی حالت نازک مگر مستحکم رہی۔ ان کے والد، شہزادہ خالد بن طلال، نے اعلان کیا ہے کہ شہزادہ الولید کی نمازِ جنازہ اتوار کے روز ریاض کی امام ترکی بن عبداللہ مسجد میں نمازِ عصر کے بعد ادا کی جائے گی۔

شہزادہ الولید سعودی عرب کے بانی شاہ عبدالعزیز کے پڑپوتے تھے، اور اپنے طویل بیماری کے سفر کے دوران صبر، محبت اور امید کی علامت کے طور پر جانے جاتے رہے۔ ان کے ساتھ پیش آنے والے واقعے نے نہ صرف سعودی عوام بلکہ دنیا بھر کے لوگوں کو گہرے جذباتی اثر میں مبتلا کیا۔

سعودی شاہی خاندان کی جانب سے شہزادہ الولید کے انتقال پر گہرے دکھ اور افسوس کا اظہار کیا گیا ہے، جبکہ ان کے اہل خانہ کے لیے صبر اور حوصلے کی دعا کی گئی ہے۔