سینیٹ الیکشن میں ایک بھی نام بانی پی ٹی آئی کی مشاورت کے بغیر نہیں شامل کیا گیا،بیرسٹر گوہر

اسلام آباد: چیئرمین پاکستان تحریک انصاف (پی ٹی آئی) بیرسٹر گوہر نے کہا ہے کہ سینیٹ الیکشن میں ایک نام بھی بانی پی ٹی آئی عمران خان کی مشاورت کے بغیر نہیں ڈالا گیا۔

تفصیلات کے مطابق جوڈیشل کمپلیکس اسلام آباد میں میڈیا سے گفتگو کرتے ہوئے چئیرمین پی ٹی آئی بیرسٹر گوہر نے کہا کہ 9 مئی کے بعد پریس کانفرنس کرنے والے لوگوں کو ٹکٹ دینے کی بات درست نہیں، بانی پی ٹی آئی نے مرزا آفریدی کا نام فائنل کیا تھا، انہوں نے پارٹی کیخلاف کوئی بیان نہیں دیا۔

بیرسٹر گوہر نےمزید کہا کہ مخصوص نشستوں کی وجہ سے خیبر پختونخوا سینیٹ انتخابات کے معاملے میں بریک آ گیا تھا، مخصوص نشستوں کا فیصلہ ہوا تو ایسا لگا ہمیں اتنی سیٹیں اب نہیں ملیں گی جتنی بنتی ہیں۔

انہوں نے کہا کہ بانی پی ٹی آئی احتجاج کو جیل سے خود لیڈ کریں گے۔ مذاکرات کا وقت ختم اب جو بھی ہوگا بانی پی ٹی آئی کی ہدایات پر ہو گا۔

چئیرمین پی ٹی آئی کا مزید کہنا تھا کہ 2 سال ہو گئے ہیں اب سختیاں ختم ہونی چاہئیں، بانی پی ٹی آئی سے ملاقات سے متعلق عدالتی فیصلوں کی خلاف ورزی کی جا رہی ہے،ان سےآخری ملاقات بیرسٹرسیف کی ہوئی اور پھر بہنوں کی ملاقات ہوئی۔