برطانیہ: دوران پرواز تربیتی ہیلی کاپٹر گر کر تباہ،3 افراد جاں بحق

لندن: برطانیہ میں تربیتی پرواز کے دوران ہیلی کاپٹر گِر کر تباہ ہو گیا جس کے نتیجے میں 3 افراد جاں بحق ہو گئے۔

غیر ملکی خبر رساںادارے کے مطابق تربیتی ہیلی کاپٹر میں عملے کے 4 افراد سوار تھے جو آئل آف وائٹ میں کھیتوں میں گر کر تباہ ہوا۔

میڈیا رپورٹ کے مطابق حادثے کے نتیجے میں 3 افراد جاں بحق جبکہ ایک شخص شدید زخمی ہو گیا،زخمیوں کو ایئر ایمبولینس کے ذریعے اسپتال منتقل کیا گیا جہاں تین افراد دم توڑ گئے جب کہ ایک کی حالت تشویشناک ہے۔

دوسری جانب رائل ائیر فورس کا کہنا ہے کہ اس وقت ہم متاثرین کے بارے میں مزید معلومات فراہم کرنے سے قاصر ہیں کیونکہ ان کے اہل خانہ سے رابطہ کرنے اور مدد کرنے کی کوششیں جاری ہیں۔

بیان میں مزید کہا گیا ہے کہ “ہم واقعے کے حالات پر کوئی تبصرہ نہیں کریں گے لیکن ایئر ایکسیڈنٹ انویسٹی گیشن برانچ کے ساتھ مل کر کام جاری رکھیں گے۔”