اگلے ماہ عدلیہ کی آزادی، جمہوریت کی بحالی اور بانی کی رہائی کے لیے جلسہ کرنے جا رہے ہیں، گوہرخان

اسلام آباد: پاکستان تحریک انصاف( پی ٹی آئی ) کے چئیرمین بیرسٹر گوہر خان نے کہا ہے کہ ستمبر سے ہم عدلیہ کی آزادی، جمہوریت کی بحالی اور بانی پی ٹی آئی کی رہائی کے لیے بہت بڑا جلسہ کرنے جا رہے ہیں۔

تفصیلات کے مطابق وفاقی دارالحکومت اسلام آبادمیں میڈیا سے گفتگو کرتے ہوئے چئیرمین بیرسٹر گوہر کا کہنا تھا کہ مجھے بہت خوشی ہوئی ہے، آج تین ماہ کے بعد میں نے بانی پی ٹی آئی سے ملاقات کی۔

انہوں نے کہا کہ بہت اچھا لگا یہ ملاقاتیں جاری رہنی چاہئیں، ملاقاتوں پر پابندی نہیں ہونی چاہیے، اچھی باتیں کی جانی چاہئیں، میں ہمیشہ مفاہمت کی کوشش کرتا ہوں،ان کا مزید کہنا تھا کہ اگلے ماہ ستمبر سے ہم عدلیہ کی آزادی، جمہوریت کی بحالی اور بانی پی ٹی آئی کی رہائی کے لیے بہت بڑا جلسہ کرنے جا رہے ہیں۔

بیرسٹر گوہر نے کہا کہ جیل میں بانی پی ٹی آئی کو تمام سہولیات مل رہی ہیں، انہیں اخبار بھی اب مہیا کیے جا رہے ہیں، آج کی ملاقات میں ملکی اور پارٹی امور سمیت کے پی کے میں سیلاب کی صورتحال پر گفتگو ہوئی ہے۔

قومی اسمبلی میں لیڈز آف اپوزیشن کی تعیناتی کے حوالے سے گفتگو کرتے ہوئے ان کا کہنا تھا کہ اپوزیشن لیڈر کا حتمی فیصلہ بانی پی ٹی آئی نے کرنا ہے،پارٹی کے کسی سطح پر کوئی مذاکرات نہیں ہورہے،علیمہ خان کا پارٹی امور سے کوئی تعلق نہیں۔

ان کا کہنا تھا کہ بانی پی ٹی آئی نے کے پی کے میں طوفانی بارشوں سے ہونے والی تباہی پر دکھ اور افسوس کا اظہار کیا انہوں نے صوبے میں متاثرین کی بحالی کے لیے بھرپور امدادی کارروائیوں کی ہدایت کی ہے۔

ایک اور سوال کے جواب میں چیئرمین پی ٹی آئی کا کہنا تھا کہ سلمان اکرم راجہ نے استعفی دیا ہی نہیں تھا، استعفیٰ زبانی تھا، لہٰذا منظور یا مسترد ہونے کا معاملہ سامنے نہیں آیا۔