بلوچستان :سیکیورٹی فورسز کی بڑی کارروائی،فتنہ الخوارج کے 47 دہشت گردجہنم واصل

راولپنڈی: سیکیورٹی فورسز نے بلوچستان میں بڑی کارروائی کرتے ہوئے فتنہ الخوارج کے 47 دہشت گردوں کو جہنم واصل کر دیا۔

سیکیورٹی ذرائع کے مطابق 7 سے 9 اگست کے درمیان سیکورٹی فورسز نے بلوچستان کے علاقے سمبازا میں کارروائی کی، جہاں فتنہ الخواج کے دہشت گردوں کی بڑی تعداد بارڈر کراس کرنے کی کوشش کررہی تھی۔

ذرائع کے مطابق سیکیورٹی فورسز نے بروقت کارروائی کرتے ہوئے فتنہ الخوارج کے 47 دہشت گردوں کو ہلاک کردیا۔

ذرائع نے مزید بتایا کہ مارے جانے والے تمام دہشتگرد افغان تھے۔ اور دہشتگردوں کی لاشیں افغانستان کی حدود میں ہی گریں۔ دہشتگردوں کے مارے جانے کے 15 دن بعد بھی ان کی لاشیں اٹھانے کوئی نہیں آیا۔ اور افغانستان کی طرف گرنے والی لاشیں گلتی سڑتی رہیں۔

سیکیورٹی ذرائع کے مطابق 25 اگست کو سرحد پر افغان حکام کے ساتھ جرگے کے بعد ان لاشوں کو گدھوں پر لاد کر لے جایا گیا،دہشتگردوں کی لاشیں گوشت خور جانور بھی نوچ نوچ کر اپنی بھوک مٹاتے رہے۔

سیکیورٹی ذرائع کے مطابق فتنہ الخوارج کی اس بڑی تعداد کو کسی بھی ممکنہ دہشت گردانہ کارروائی سے قبل ہی ہلاک کر دینا پاکستان کی فورسز اور اداروں کی ایک بڑی کامیابی ہے۔