افغانستان میں ہولناک زلزلے سے اموات کی تعداد ایک ہزار سے تجاوز کر گئی

کابل: افغانستان میں 6 شدت کے ہولناک زلزلے کے نتیجے میںہونے والی اموات کی تعداد ایک ہزار سے تجاوز کرگئی۔

افغان ہلال احمر کے مطابق اتوار اور پیر کی درمیانی شب آنے و الے زلزلے سے اموات کی تعداد 1124 ہوگئی ہے جب کہ زلزلے سے  3251 افراد زخمی ہیں اور 8 ہزار سے زائد گھر تباہ ہوئے ہیں۔

افغانستان کے سرکاری میڈیا کا بتانا ہےکہ زلزلے سے سب سے زیادہ نقصان صوبے کنڑ میں ہوا ہے،جبکہ ابھی تک سینکڑوں افراد ملبے تلے دبے ہوئے جن کو نکالنے کے لیے ریسکیو آپریشن جاری ہے۔

افغان ریسکیو حکام کا کہنا ہے کہ زلزلے سے زخمی ہونے والے افراد کو قریبی اسپتالوں میں منتقل کر دیا گیا ہے جہاں ان کو صحت کی بہتر سہولیات دی جا رہی ہیں۔

دوسری جانب امریکی جیولوجیکل سروے کے مطابق زلزلےکا مرکز صوبے ننگرہار کے شہر جلال آباد کے قریب تھا اور اس کی گہرائی 8 کلو میٹر ریکارڈ کی گئی۔

رپورٹس کے مطابق زلزلہ مقامی وقت کے مطابق رات 11 بجکر 47 منٹ پر آیا اور تقریباً 20 منٹ بعد ہی اسی صوبے میں 4.5 شدت کا ایک اور جھٹکا محسوس کیا گیا جس کی گہرائی 10 کلو میٹر تھی۔