خیبرپختونخوا میں دریا کے کنارے غیر تعمیر شدہ ہوٹلز اور کمرشل اراضی کے این او سیز منسوخ

پشاور: خیبر پختونخوا حکومت نے دریا کنارے قائم کیے جانے والے غیر تعمیر شدہ ہوٹلز اور کمرشل اراضی کے این او سیز منسوخ کرنے کا فیصلہ کر لیا ہے۔ 

تفصیلات کے مطابق ڈی جی لینڈ یوز اینڈ بلڈنگ کنٹرول اتھارٹی کی جانب سے جاری کردہ ہدایت نامے کے مطابق صوبے کے تمام چیف پلاننگ کنٹرول افسران کو باضابطہ طور پر خط ارسال کردیا گیا ہے، جس میں کہا گیا ہے کہ ایسی عمارتوں کے این او سیز منسوخ کیے جائیں جن پر ابھی تک تعمیراتی کام کا آغاز نہیں ہوا۔

ذرائع کے مطابق یہ فیصلہ حالیہ بارشوں اور شدید سیلابی صورتحال کے پیش نظر کیا گیا ہے۔ حکومتی حکام کا کہنا ہے کہ دریا کنارے غیر منصوبہ بند تعمیرات سے ماحولیاتی اور انسانی جانوں کو شدید خطرات لاحق ہیں۔ 

سوات، مالا کنڈ اور ہزارہ ڈویژن میں سیلاب کے باعث بڑے پیمانے پر نقصانات کے بعد یہ اقدام کرنا ناگزیر سمجھا گیا۔ 

ذرائع کے مطابق متعدد تحصیل میونسپل ایڈمنسٹریشنز نے جانچ پڑتال کے بغیر غیر قانونی طور پر این او سیز جاری کیے تھے، جس پر صوبائی حکومت نے سخت نوٹس لیتے ہوئے ان این او سیز کو منسوخ کردیا۔