ہمارا فیصلہ اٹل ہے، ہم استعفے واپس نہیں لیں گے، یہ بانی پی ٹی آئی کی واضح ہدایات ہیں،بیرسٹر گوہر

اسلام آباد: پاکستان تحریک انصاف (پی ٹی آئی) کے چیئرمین بیرسٹر گوہر نے کہا ہے کہ اسپیکر استعفیٰ قبول نہیں کر رہے ہیں لیکن ہمارا فیصلہ اٹل ہے۔ ہم استعفے واپس نہیں لیں گے کیونکہ یہ بانی پی ٹی آئی کی واضح ہدایات ہیں۔

تفصیلات کے مطابق اسلام آباد میں میڈیا سے گفتگو کرتے ہوئے چیئرمین پی ٹی آئی بیرسٹر گوہر نےکہا کہ ہمارے تمام اراکین قومی اسمبلی ستعفے دے چکے ہیں، صرف ان کے استعفے رہتے ہیں جو ملک سے باہر ہیں۔

ملک میں پید ا ہونے والی شدید سیلابی صورتحال کے حوالے سے گفتگو کرتے ہوئےانہوں نے کہا کہ جس طرح دہشتگردی کے خلاف نیشنل ایکشن پلان بنایا گیا اسی طرح زلزلے اور سیلاب کے خلاف بھی نیشنل ایکشن پلان بنانا چاہیے،ان کا کہنا تھا کہ یہ وقت الزامات کا نہیں بلکہ عملی کام کرنے کا ہے کیوںکہ یہاں بہت لوگ متاثر ہو چکے ہیں۔

میڈیا سے گفتگو میں انہوں نےمزید کہا کہ کوئی ایسی پالیسی بنانی چاہیے جس میں پنجاب یا خیبر پختونخوا نہیں بلکہ پاکستان ہو،نقصان کسی بھی صوبے کا ہو یہ پاکستان اور ہمارے بھائیوں کا نقصان ہے۔ روی، سیالکوٹ، وزیر آباد، سوات میں سیلاب کی تحقیقات ہونی چاہیے۔

ان کا کہناتھا کہ سیاست میں کوئی دوست دشمن نہیں ہوتا۔ بلکہ پالیسی چلتی ہے۔ وقت کے ساتھ سیاسی دشمن دوست اور دوست سیاسی حریف بھی بن جاتے ہیں۔ بانی پی ٹی آئی کا ہر فیصلہ قابل قبول ہے اور انہوں نے وجوہات بھی بتائی ہیں۔

انہوں نے کہا کہ فی الحال ہمارے اپوزیشن لیڈر عمر ایوب ہی ہیں۔ بانی نے محمود اچکزئی کو نامزد ضرور کیا ہے اگر عدالتی اسٹے نہیں ملتے تو محمود اچکزئی ہی اپوزیشن لیڈر ہوں گے۔