کالا باغ ڈیم پر علی امین گنڈاپور کا بیان ذاتی رائے ہے، پی ٹی آئی کی پالیسی نہیں: اسد قیصر

اسلام آباد: پاکستان تحریک انصاف (پی ٹی آئی) کے سینئر رہنما اور سابق اسپیکر قومی اسمبلی اسد قیصر نے کہا ہے کہ وزیراعلیٰ خیبرپختونخوا علی امین گنڈاپور کا کالا باغ ڈیم سے متعلق حالیہ بیان ان کی ذاتی رائے ہے، پارٹی کی پالیسی نہیں۔

ایک بیان میں اسد قیصر کا کہنا تھا کہ "ہم نہیں سمجھتے کہ اس وقت کالا باغ ڈیم کی کوئی ضرورت ہے، جبکہ ملک میں کئی اور چھوٹے ڈیم بنائے جا سکتے ہیں جو علاقائی ضروریات پوری کر سکتے ہیں۔"

انہوں نے مزید کہا کہ علی امین گنڈاپور کے اپنے حلقے میں چشمہ رائٹ بینک کینال کا ایک اہم منصوبہ زیر غور ہے، جو ان کے علاقے کی پانی کی ضرورت کو پورا کر سکتا ہے۔

اسد قیصر کا کہنا تھا کہ، "متنازع معاملات کو غیر ضروری طور پر چھیڑنا مناسب نہیں۔ ہمیں ایسے مسائل پر قومی اتفاقِ رائے کی ضرورت ہے، نہ کہ سیاسی تقسیم۔"

علی امین گنڈاپور کالا باغ ڈیم کے حق میں، قومی مفاد کی دلیل

دوسری جانب، وزیراعلیٰ خیبرپختونخوا علی امین گنڈاپور نے گزشتہ دنوں اسلام آباد میں میڈیا سے گفتگو کرتے ہوئے کالا باغ ڈیم کو ملکی ضروریات اور آنے والی نسلوں کا مسئلہ قرار دیا تھا۔

ان کا کہنا تھا کہ، "کالا باغ ڈیم نہ بنانا ملک اور قوم کے ساتھ زیادتی ہے۔ اگر یہ ڈیم بنتا ہے تو پنجاب، سندھ اور خیبرپختونخوا تینوں کو فائدہ ہوگا۔ سندھ کو اگر تحفظات ہیں تو بات چیت ہونی چاہیے۔"

انہوں نے کہا کہ، "سیاست کی وجہ سے یہ منصوبہ رکا ہوا ہے۔ میں صوبائیت کے چکر میں پورے پاکستان کو نقصان نہیں پہنچا سکتا۔ سب کو مطمئن کرکے اس منصوبے کو مکمل کیا جانا چاہیے۔"