خیبرپختونخوا حکومت کا افغان زلزلہ متاثرین کے لیے امدادی سامان روانہ

پشاور: خیبرپختونخوا حکومت نے افغانستان میں زلزلہ متاثرین کی مدد کے لیے امدادی سامان کی پہلی کھیپ روانہ کر دی ہے۔ اس سلسلے میں پی ڈی ایم اے آفس میں ایک باقاعدہ تقریب منعقد ہوئی جس میں چیف سیکرٹری خیبرپختونخوا شہاب علی اور افغان قونصل جنرل محب اللہ شاکر نے شرکت کی۔

کیا شامل ہے امدادی سامان میں؟

سرکاری اعلامیے کے مطابق امدادی سامان میں شامل اشیاء درج ذیل ہیں:

خیمے ، ترپال ، رضائیاں ، کمبل ، دو ٹرک ادویات ، تکیے چیف سیکرٹری شہاب علی نے اس موقع پر کہا "مشکل کی اس گھڑی میں افغان بھائیوں کے ساتھ کھڑے ہیں، امداد کا یہ سلسلہ متاثرہ خاندانوں کی مکمل بحالی تک جاری رہے گا۔"

افغانستان میں زلزلے کی تباہ کاریوں کا پس منظر

خیال رہے کہ افغانستان میں اتوار اور پیر کی درمیانی شب آنے والے 6 شدت کے خطرناک زلزلے سے اب تک 1,411 افراد جاں بحق اور 3,251 سے زائد زخمی ہو چکے ہیں۔ افغان ہلال احمر کے مطابق زلزلے کے باعث 8 ہزار سے زائد گھر تباہ ہو گئے۔

افغان سرکاری میڈیا کے مطابق زلزلے سے سب سے زیادہ متاثرہ علاقہ صوبہ کنڑ ہے، جبکہ امریکی جیولوجیکل سروے کے مطابق زلزلے کا مرکز ننگرہار کے قریب شہر جلال آباد تھا، اور اس کی گہرائی 8 کلومیٹر ریکارڈ کی گئی۔