دریائے چناب میں بھارت سے آنے والا دوسرا بڑا سیلابی ریلا داخل، ہیڈ مرالہ پر ہائی الرٹ

بھارت کے زیرِ قبضہ جموں کے علاقے اکھنور سے آنے والا دوسرا بڑا سیلابی ریلا پاکستان میں دریائے چناب میں داخل ہو گیا ہے، جس کے نتیجے میں ہیڈ مرالہ کے مقام پر پانی کی سطح انتہائی اونچے درجے تک پہنچ چکی ہے۔

انتہائی سیلابی صورتِ حال کے باعث چناب پل کو ہر قسم کی ٹریفک کے لیے بند کر دیا گیا ہے، جب کہ مقامی انتظامیہ کو ہائی الرٹ پر رکھا گیا ہے۔

پاکستانی حکام کے مطابق، بھارت کی جانب سے چھوڑا گیا سیلابی ریلا اب ہیڈ خانکی کی طرف بڑھ رہا ہے۔ خطرے کے پیش نظر درجنوں دیہات خالی کروا لیے گئے ہیں، جب کہ ہیڈ خانکی کے قریب ممکنہ طور پر پہلا حفاظتی شگاف ڈالنے کی تیاریاں مکمل کر لی گئی ہیں۔ یہ شگاف اس وقت ڈالا جائے گا جب پانی کا بہاؤ 6 لاکھ کیوسک سے تجاوز کرے گا۔

دوسری جانب، انتظامیہ کی جانب سے 450 دیہات کو خالی کرانے کے لیے مساجد میں اعلانات کروا دیے گئے ہیں۔ بھلوال کے علاقے طالب والا پتن کے قریب شدید کٹاؤ کے باعث کئی ایکڑ زرعی اراضی تباہ ہو چکی ہے۔

دریائے راوی بھی سیلابی صورتِ حال سے متاثر ہے۔ عبدالحکیم کے مقام پر ریلوے ٹریک کے قریب راوی کا پانی گزرنا شروع ہو گیا ہے۔ ملتان میں اکبر فلڈ بند پر دباؤ کم کرنے کے لیے ہیڈ محمد والا پر شگاف ڈالنے کا فیصلہ متوقع ہے۔

بھارت نے پاکستان کو آگاہ کر دیا:

بھارت نے پاکستان کو دریائے ستلج میں اونچے درجے کے سیلاب کے بارے میں باقاعدہ طور پر مطلع کر دیا ہے۔ بھارتی ہائی کمیشن کی جانب سے وزارتِ آبی وسائل کو موصول ہونے والے مراسلے میں بتایا گیا ہے کہ دریائے ستلج کے ہریکے زیریں اور فیروز پور زیریں کے مقامات پر شدید سیلابی کیفیت ہے۔

اسی مراسلے میں دریائے توی میں بھی مقبوضہ جموں کے مقام پر اونچے درجے کے سیلاب کی اطلاع دی گئی ہے۔

مزید بارشوں کی پیشگوئی:

پی ڈی ایم اے پنجاب نے خبردار کیا ہے کہ صوبے میں 5 ستمبر تک مزید بارشوں کی توقع ہے، جس کے باعث موجودہ سیلابی صورتِ حال میں مزید شدت آنے کا خدشہ ہے۔