سیلاب میں ڈوبی غیرقانونی ہاؤسنگ سکیمیں: اینٹی کرپشن ان ایکشن

پنجاب میں حالیہ سیلاب کے دوران تباہ ہونے والی غیرقانونی ہاؤسنگ سکیموں کے خلاف محکمہ اینٹی کرپشن نے بڑا قدم اٹھاتے ہوئے ان سکیموں کا مکمل ریکارڈ طلب کر لیا ہے۔

ڈی جی اینٹی کرپشن پنجاب سہیل ظفر چٹھہ کے مطابق، روڈا (راوی اربن ڈویلپمنٹ اتھارٹی) اور ایل ڈی اے (لاہور ڈویلپمنٹ اتھارٹی) کو سمن جاری کیے گئے ہیں اور دریائے راوی کے اطراف قائم تمام ہاؤسنگ اسکیموں کا ڈیٹا طلب کیا گیا ہے۔

سہیل ظفر چٹھہ نے انکشاف کیا کہ ایک بڑی غیرقانونی ہاؤسنگ سکیم، جو ٹھوکر کے قریب 11 ہزار کنال اراضی پر قائم ہے، شہریوں کو دھوکہ دے کر بنائی گئی۔ اس سکیم کے مالک پر الزام ہے کہ اس نے 8 ارب روپے دبئی منتقل کیے، اور اس میں ایل ڈی اے کے افسران بھی شریک جرم ہیں۔

انہوں نے بتایا کہ ایک نجی ہاؤسنگ سکیم کے مالک کو گرفتار کر لیا گیا ہے، جب کہ مزید گرفتاریاں متوقع ہیں۔ تحقیقات کا دائرہ کار وسیع کیا جا رہا ہے تاکہ دیگر ایسی سکیموں اور ان کے سرپرستوں کو بھی قانون کے کٹہرے میں لایا جا سکے۔

ڈی جی اینٹی کرپشن نے یقین دہانی کروائی کہ متاثرہ شہریوں کو ان کی لوٹی گئی رقم واپس دلوانے کی کوشش کی جا رہی ہے۔ ان کے مطابق، وزیراعلیٰ پنجاب مریم نواز نے واضح ہدایات جاری کی ہیں کہ کرپشن میں ملوث سرکاری افسران کے خلاف کوئی رعایت نہ برتی جائے۔