جناح ہاؤس کیس: علیمہ خان کے بیٹے شاہ ریز خان کی ضمانت منظور

لاہور: انسدادِ دہشت گردی کی عدالت نے جناح ہاؤس حملہ کیس میں سابق وزیراعظم عمران خان کے بھانجے اور علیمہ خان کے صاحبزادے شاہ ریز خان کی بعد از گرفتاری ضمانت منظور کرتے ہوئے رہائی کا حکم جاری کر دیا ہے۔

عدالت کے جج منظر علی گل نے درخواستِ ضمانت پر محفوظ شدہ فیصلہ سنایا، جس کے مطابق شاہ ریز خان کو مقدمے میں ناکافی شواہد کی بنیاد پر ضمانت دی گئی۔

سماعت کے دوران شاہ ریز کے وکیل رانا مدثر عمر نے مؤقف اختیار کیا کہ ان کے مؤکل پر کارکنوں کو اکسانے کا الزام لگایا گیا، تاہم تحقیقات میں ان کے خلاف کوئی ثبوت سامنے نہیں آیا۔ نہ تو جیو فینسنگ کے ذریعے کوئی تعلق ثابت ہو سکا، اور نہ ہی پولیس چالان یا دیگر ریکارڈ میں ان کا ذکر موجود ہے۔

وکیل کے مطابق کسی تفتیشی افسر نے بھی شاہ ریز کے خلاف کوئی بیان ریکارڈ نہیں کرایا، اور ان کی گرفتاری سے قبل تقریباً 28 ماہ تک انہیں کیس میں شاملِ تفتیش نہیں کیا گیا۔

رانا مدثر کا مزید کہنا تھا کہ ان کے مؤکل کی گرفتاری سیاسی دباؤ کا نتیجہ ہے تاکہ ان کی والدہ علیمہ خان پر دباؤ ڈالا جا سکے، جو اپنے بھائی اور پاکستان تحریکِ انصاف کے بانی عمران خان کی رہائی کے لیے سرگرم رہی ہیں۔

وکیل نے عدالت کو بتایا کہ گرفتاری کے وقت شاہ ریز چترال میں موجود تھے، جس کے باقاعدہ ثبوت اور گواہان کے بیانات دستیاب ہیں۔ انہوں نے مزید کہا کہ شاہ ریز آکسفورڈ یونیورسٹی کے طالب علم اور کھلاڑی ہیں اور جلد بیرونِ ملک ایک بین الاقوامی ایونٹ میں شرکت کرنے والے تھے۔