وزیرِ دفاع خواجہ آصف سے صومالیہ کے سفیرکی ملاقات ،دوطرفہ اور باہمی دلچسپی کے امور پر تبادلۂ خیال

اسلام آباد: وزیرِ دفاع خواجہ محمد آصف سے وفاقی جمہوریۂ صومالیہ کے سفیرشیخ نور محمد حسن نے آج ملاقات کی۔

ملاقات خوشگوار ماحول میں ہوئی جس کے دوران دونوں فریقین نے گرمجوشی سے خیرسگالی کے جذبات کا تبادلہ کیا اور باہمی دلچسپی کے امور پر تبادلۂ خیال کیا۔

دوران ملاقات وزیرِ دفاع نے پاکستان اور صومالیہ کے درمیان دیرینہ دوستانہ تعلقات کو اجاگر کیا جو مشترکہ اقدار اور عوامی روابط پر مبنی ہیں۔ انہوں نے صومالیہ میں امن، استحکام اور استعداد سازی کی کوششوں کے لیے پاکستان کی مسلسل حمایت کا اعادہ کیا۔

ملاقات میں صومالی سفیر نے حکومتِ پاکستان اور پاکستانی عوام کا مسلسل تعاون اور حمایت پر شکریہ ادا کیا اور صومالیہ میں امن و ترقی کے لیے پاکستان کی خدمات کو سراہا۔

دونوں فریقین نے باہمی روابط اور تعاون کے تسلسل کے ذریعے دوطرفہ تعلقات کو مزید مستحکم کرنے کے عزم کا اظہار کیا۔