افغان زلزلہ زدگان کیلئے پاکستان سے 105 ٹن امدادی سامان روانہ

اسلام آباد: پاکستان نے افغانستان میں حالیہ زلزلے سے متاثرہ افراد کی مدد کے لیے 105 ٹن امدادی سامان روانہ کر دیا ہے۔ اس بات کا اعلان نائب وزیراعظم اور وزیر خارجہ اسحٰق ڈار نے اپنے ایکس (سابق ٹوئٹر) اکاؤنٹ پر کیا۔

اسحٰق ڈار نے بتایا کہ یہ اقدام ان کی افغان وزیر خارجہ امیر خان متقی سے ٹیلیفونک رابطے کے بعد کیا گیا۔ ان کے مطابق روانہ کیا گیا امدادی سامان اشیائے خور و نوش، ادویات، خیمے، کمبل اور گدے پر مشتمل ہے۔

وزیر خارجہ نے کہا "ہم جاں بحق افراد کے لیے گہری ہمدردی اور دعاؤں کا اظہار کرتے ہیں، اور زخمیوں کی جلد صحتیابی کے خواہاں ہیں۔ پاکستان اس مشکل گھڑی میں افغان بھائیوں کے ساتھ مکمل یکجہتی کے ساتھ کھڑا ہے۔"

افغانستان میں زلزلے کی تباہ کاریاں

طالبان حکام کے مطابق افغانستان میں حالیہ زلزلے کے باعث 1469 افراد جاں بحق اور 3700 سے زائد زخمی ہو چکے ہیں۔ خبر رساں ادارے اے ایف پی کے مطابق یہ زلزلہ افغانستان کی حالیہ دہائیوں کا سب سے ہلاکت خیز زلزلہ قرار دیا جا رہا ہے۔

زلزلے سے سب سے زیادہ متاثرہ علاقہ صوبہ کنڑ ہے، جہاں 1450 سے زائد اموات رپورٹ ہوئی ہیں، جبکہ ننگرہار اور لغمان میں بھی درجنوں افراد جان کی بازی ہار چکے ہیں۔