جناح ہاؤس حملہ کیس: علیمہ خان کے دوسرے شیر شاہ کی بھی ضمانت منظور

لاہور: انسداد دہشت گردی عدالت ( اے ٹی سی) لاہور نے جناح ہاؤس حملہ کیس میں بانی پی ٹی آئی کے دوسرے بھانجے اور علیمہ خان کے بیٹے شیر شاہ کی بھی ضمانت منظور کرتے ہوئے ان کو رہا کرنے کا حکم دے دیا۔

تفصیلات کے مطابق لاہور کی انسداد دہشتگردی عدالت میں جناح ہاؤس حملہ کیس کی سماعت ہوئی ، اس دوران شیر شاہ کی جانب سے رانا مدثر عمر ایڈوکیٹ نے دلائل دیے۔

دوران سماعت وکیل رانا مدثر نے عدالت کو بتایا کہ اس مقدمہ میں ابھی تک ملزم کی حد تک چالان نہیں آیا، ٹرائل نہ جانے کب شروع ہو لہذا لامحدود وقت تک ملزم کو قید نہیں رکھا جاسکتا۔

اے ٹی سی جج منظر علی گل نے کیس کی سماعت کے بعد فیصلہ سناتے ہوئے شیر شاہ کی رہائی کا حکم دیا۔

عدالتی حکم کے مطابق شیر شاہ کی جانب سے ضمانت کی درخواست ایک لاکھ روپے مالیت کے ضمانتی مچلکوں کے عوض منظور کی گئی ہے، جس کے جمع کرانے پر انہیں رہا کردیا جائے گا۔

خیال رہے کہ چند روز قبل لاہور پولیس نے انہیں جناح ہاؤس حملہ کیس میں گرفتار کیا تھا، جو کہ 9 مئی 2023 کے واقعات کے بعد درج ہونے والے بڑے مقدمات میں شمار ہوتا ہے۔

یاد رہے کہ گزشتہ روز انسدادِ دہشت گردی عدالت لاہور نے بانی پی ٹی آئی عمران خان کے بھانجے اور علیمہ خان کے بیٹے شاہ ریز خان کو جناح ہاؤس حملہ کیس میں ضمانت پر رہا کرنے کا حکم دیا تھا۔