ملتان: جلالپور پیر والا میں پانی داخل ہونا شروع،شہر کو خالی کرنے کا حکم دے دیاگیا

ملتان:ملتان کے نواحی علاقے جلالپور پیروالامیں بند ٹوٹنے سے پانی شہر میں داخل ہونا شروع ہو گیا جبکہ انتظامیہ کی جانب شہر کو خالی کرنے کا حکم دے دیا گیا ہے۔

تفصیلات کے مطابق ملتان کی تحصیل جلال پور پیر والا میں سیلابی پانی داخل ہونے کے کے باعث عوام کو گھر خالی کرنےکی ہدایت کر دی گئی ہے، پولیس کی جانب سے گھر خالی کرنے کے لیے مساجد سے اعلانات بھی کیے جا رہے ہیں۔

سیلابی صورتحال کے باعث شہریوں کو فوری طور پر محفوظ مقامات پر منتقل ہونے کی ہدایت کی گئی جب کہ ریسکیو 1122 کی مزید ٹیمیں بھی جلال پور پیر والا روانہ ہوگئی ہیں۔

اس حوالے سے سی پی او صادق علی ڈوگر کا کہنا ہے کہ پانی کا دباؤ بہت زیادہ بڑھ چکا ہے، چناب کا پانی شہرکے قریب بنائے جانے والے بند کو کسی بھی وقت توڑ سکتا ہے۔

سی پی او کا کہنا ہے کہ شہری فوری طور پر مکانات خالی کرکےمحفوظ مقامات پر منتقل ہوجائیں،ان کا مزید کہنا تھا کہ توقع ہے آج رات پھنسے تمام افراد کو محفوظ مقامات پر منتقل کردیا جائےگا۔

صادق علی ڈوگر کے مطابق لوگوں کو ریسکیو کرنے کے لیے 5 تھرمل ٹیکنالوجی ڈرون منگوائے ہیں، تحصیل جلالپور کےلیے50 کشتیاں مزید منگوائی گئی ہیں۔

دوسری جانب ملتان کے شیر شاہ فلڈ بند کے اندر موجود درجنوں بستیوں میں کھڑے پانی کے باعث مکانات گرنا شروع ہو گئے ہیں جبکہ بارش کے باعث سیلاب متاثرین کی مشکلات میں مزید اضافہ ہو گیا ہے۔