ڈیٹا لیکج کا معاملہ،وزیر داخلہ محسن نقوی نے خصوصی تحقیقاتی ٹیم تشکیل دے دی

اسلام آباد:وفاقی وزیر داخلہ محسن نقوی نے موبائل سمز کا ڈیٹا  لیک ہونے سے متعلق  نشر ہونے والی  خبرکا فوری  نوٹس  لے لیا۔

ترجمان وزارتِ داخلہ کا کہنا ہے کہوزیر داخلہ کی ہدایت پر نیشنل سائبر کرائمز انویسٹی گیشن ایجنسی متحرک ہوگئی اور ایک خصوصی انویسٹی گیشن ٹیم تشکیل دے دی گئی ہے۔

 تحقیقاتی ٹیم نے کام شروع کر دیا جو ڈیٹا لیکیج کے معاملے کی ہر پہلو سے تحقیقات کرے گی،ڈیٹا  لیکج  میں  ملوث  عناصر  کا تعین  کرکے قانونی  کارروائی  عمل  میں  لائی  جائے  گی ۔

ترجمان وزارت داخلہ نے مزید بتایا کہ تحقیقاتی  ٹیم  14 روز میں  اپنی  رپورٹ  پیش  کرے گی۔

رپورٹ کے مطابق انٹرنیٹ پر موبائل سم مالکان کے ایڈریس، کال ریکارڈ، شناختی کارڈ کی نقول، بیرون ملک سفر کی تفصیلات سمیت ذاتی معلومات کی فروخت جاری ہے۔

خیال رہے کہ اس لیک ہونے والے ڈیٹا میں وفاقی وزراء، اہم حکومتی شخصیات اور اعلیٰ سرکاری افسران کے علاوہ عام پاکستانیوں کی معلومات بھی شامل ہیں۔