ایک ننھا چہرہ، ایک بڑی آزمائش، آزاد کشمیر کا نوجوان سعد علاج کا منتظر

ویب ڈیسک:(احسان اللہ اسحاق)آزاد کشمیر کے ضلع جہلم ویلی کے گاؤں کوٹلی چکار سے تعلق رکھنے والا نوجوان سوشل میڈیا انفلوئنسر سعد ایک کڑے امتحان سے گزر رہا ہے۔ بچپن میں پیش آنے والے ایک حادثے کے باعث سعد کا چہرہ بری طرح جھلس گیا تھا، جس کے اثرات آج بھی اس کی زندگی، اعتماد اور مستقبل پر گہرے ہیں۔

سعد کے اہلِ خانہ کا کہنا ہے کہ اس حادثے نے نہ صرف اس کی جسمانی شناخت کو متاثر کیا بلکہ سماجی زندگی کو بھی مشکل بنا دیا۔ سعد کے والد کراچی میں مزدوری کرتے ہیں اور بڑی مشکل سے اپنے خاندان کا گزارا کرتے ہیں۔ محدود آمدن کے باعث وہ سعد کے مہنگے علاج اور سرجری کے اخراجات برداشت کرنے سے قاصر ہیں۔

ڈاکٹروں کے مطابق سعد کے چہرے کی بحالی کے لیے متعدد مراحل پر مشتمل علاج اور سرجری درکار ہے، جس پر تقریباً 12 لاکھ روپے لاگت آئے گی۔ یہ رقم اس غریب خاندان کے لیے کسی خواب سے کم نہیں۔

 

 

 

 

 

View this post on Instagram

 

 

 

 

 

 

 

 

 

 

 

A post shared by SaaD Bin KhursheeD12 (@saadbinkhursheed12)

سعد نے حال ہی میں سوشل میڈیا پلیٹ فارم انسٹاگرام پر ایک ویڈیو پیغام کے ذریعے مخیر حضرات سے مدد کی اپیل کی ہے۔ ویڈیو میں سعد کا کہنا تھا کہ وہ بھی عام نوجوانوں کی طرح ایک نارمل زندگی گزارنا چاہتا ہے، اعتماد کے ساتھ لوگوں کے سامنے آنا اور اپنے مستقبل کو بہتر بنانا چاہتا ہے۔

اہلِ علاقہ اور سوشل میڈیا صارفین سعد کی اس اپیل پر ہمدردی کا اظہار کر رہے ہیں اور مخیر حضرات سے اس کے علاج میں مدد کی درخواست کر رہے ہیں۔

سماجی حلقوں کا کہنا ہے کہ اگر بروقت مدد فراہم کی جائے تو سعد کی زندگی بدل سکتی ہے۔شہریوں نے حکومت، فلاحی اداروں اور صاحبِ حیثیت افراد سے اپیل کی ہے کہ وہ سعد کے علاج کے لیے آگے بڑھیں تاکہ ایک نوجوان کو نئی زندگی کی امید مل سکے۔