سیلاب سے معیشت کو دھچکا، شرح سود 9 فیصد پر لانے کی تجویز

پاکستانی معاشی تھنک ٹینک "اکنامک پالیسی اینڈ بزنس ڈویلپمنٹ" نے اپنی تازہ رپورٹ میں سیلاب کی تباہ کاریوں سے ملکی معیشت پر پڑنے والے شدید منفی اثرات پر تشویش کا اظہار کیا ہے۔

رپورٹ میں کہا گیا ہے کہ حالیہ سیلاب نے زراعت، صنعت اور مجموعی معیشت کو بری طرح متاثر کیا ہے، جس کے نتیجے میں جی ڈی پی میں کمی اور بے روزگاری میں اضافے کا خدشہ ہے۔ تھنک ٹینک نے حکومت سے مطالبہ کیا ہے کہ معاشی شرح نمو کو سہارا دینے کے لیے فوری طور پر ہنگامی اقدامات کیے جائیں، جن میں سب سے اہم اقدام شرح سود کو کم کرنا ہے۔

رپورٹ کے مطابق پاکستان میں اس وقت 11 فیصد شرح سود کاروباری لاگت میں اضافے کا باعث بن رہی ہے، جو علاقائی ممالک کے مقابلے میں زیادہ ہے۔

تھنک ٹینک نے تجویز دی ہے کہ شرح سود کو فوری طور پر 9 فیصد پر لایا جائے، جس سے تقریباً 3 ہزار ارب روپے کی مالیاتی گنجائش پیدا ہو سکتی ہے، جو کہ سیلاب متاثرہ علاقوں میں انفراسٹرکچر کی بحالی، صنعتوں کی بحالی اور لاکھوں افراد کو روزگار کی فراہمی کے لیے استعمال کی جا سکتی ہے۔ رپورٹ میں مزید کہا گیا ہے کہ پاکستان میں بے روزگاری کی شرح 22 فیصد تک پہنچ چکی ہے، اس لیے مانیٹری پالیسی میں مرحلہ وار نرمی لا کر دسمبر 2025 تک شرح سود کو 6 فیصد پر لایا جائے۔

تھنک ٹینک کے مطابق موجودہ سخت مالیاتی پالیسی اور بلند شرح سود معیشت کی بحالی میں سب سے بڑی رکاوٹ بن چکی ہے، جس سے فوری طور پر نمٹنے کی ضرورت ہے۔