اداکارہ حمیرا اصغرکی فائنل میڈیکولیگل رپورٹ تیار، موت پر مزید شکوک و شبہات

کراچی کے علاقے ڈیفنس فیز 6 میں مردہ حالت میں پائی جانے والی ماڈل و اداکارہ حمیرا اصغر کی فائنل میڈیکو لیگل رپورٹ نے ان کی موت کے حوالے سے کئی نئے سوالات اور شکوک و شبہات کو جنم دے دیا ہے۔

رپورٹ کے مطابق حمیرا اصغر کے کپڑوں پر خون کے نشانات اور ڈی این اے کے شواہد ملے ہیں، جس سے واقعے کے پراسرار ہونے کا اشارہ ملتا ہے۔ مزید یہ کہ لاش مکمل نہیں تھی، صرف ہڈیاں باقی تھیں، جس کے باعث موت کی اصل وجہ کا تعین ممکن نہیں ہو سکا۔

حمیرا کی لاش 8 جولائی کو اُس وقت ملی جب فلیٹ کے کرائے کی عدم ادائیگی کے باعث مالک مکان عدالتی بیلف کے ہمراہ فلیٹ پر پہنچا اور دروازہ توڑنے پر لاش دریافت ہوئی۔ پوسٹ مارٹم کی ابتدائی رپورٹ کے مطابق لاش شدید ڈی کمپوزیشن کے آخری مرحلے پر تھی، اور موت کو 8 سے 10 ماہ پرانا واقعہ قرار دیا گیا۔

پولیس کا کہنا ہے کہ حمیرا کا ایک موبائل فون ابھی تک غائب ہے، اور اس کا ڈیٹا تفتیش میں اہم کردار ادا کر سکتا تھا۔ حمیرا اصغر کا تعلق لاہور سے تھا لیکن وہ کئی برسوں سے کراچی میں مقیم تھیں اور 2018 سے مذکورہ فلیٹ میں رہائش پذیر تھیں۔

میڈیکو لیگل رپورٹ اور دیگر شواہد اس کیس کو ایک پراسرار اور ممکنہ طور پر مجرمانہ نوعیت کا بنا رہے ہیں، جس پر پولیس کی تفتیش جاری ہے۔