ملزم حسن زاہد سے کتنے کروڑ میں ڈیل ہوئی؟ صحافی کے سوال پر ٹک ٹاکر سامعہ حجاب خاموش

اسلام آباد:ٹک ٹاکر سامعہ حجاب نے ملزم حسن زاہد کو معاف کردیا تاہم اس حوالے سے صحافی کی جانب سےسوال کیا گیا کہ ’ انہوں نے حسن زاہد سے کتنے کروڑ میں ڈیل کی؟‘ جس کے جواب پر ٹک ٹاکر سامعہ حجاب نے خاموشی اختیار کرلی۔

تفصیلات کے مطابق ٹک ٹاکرسامعہ حجاب نے اغوا اور دھمکیاں دینے کے معاملے میں ملزم حسن زاہد کو معاف کرتے ہوئے اس کیخلاف دائرکیس واپس لے لیا ہے۔

اسلام آباد کی ڈسٹرکٹ اینڈ سیشن کورٹس میں مقدمے کی سماعت ہوئی ،اس موقع پر عدالتی عملے نے میڈیا نمائندگان کو کمرہ عدالت سے باہر نکال دیا اور کہا کہ یہ جج صاحب کا حکم ہے۔

ڈسٹرکٹ اینڈ سیشن کورٹس اسلام آباد میں پیشی کے موقع پرصحافی کی جانب سے سوال پوچھا گیا کہ آپ کی کتنے کروڑ میں ڈیل ہوئی ہے مگر ٹک ٹاکر کسی بھی سوال کا جواب دیے بغیر خاموشی سے روانہ ہوگئیں۔

کارروائی کے دوران سامعہ حجاب عدالت پیش ہوئیں اور اپنا بیان ریکارڈ کرایا۔ جج عامر ضیاء نے استفسار کیا کہ کیا آپ کا معاملہ حل ہوگیا ہے؟ جس پر سامعہ حجاب نے جواب دیا کہ جی ہمارا معاملہ طے پا گیا ہے۔ جج نے پوچھا کہ کیا آپ کیس کی مزید پیروی کرنا چاہتی ہیں؟ اس پر سامعہ حجاب نے کہا کہ میں اپنا کیس واپس لیتی ہوں۔

سامعہ حجاب نے مزید کہا کہ ملزم کی ضمانت منظور ہونے اور اس کے بری ہونے پر مجھے کوئی اعتراض نہیں۔ بعد ازاں عدالت نے ملزم حسن زاہد کی ضمانت منظور کرلی۔