اسلام آباد ہائیکورٹ کا بڑا فیصلہ، چیئرمین پی ٹی اے کو عہدے سے ہٹانے کا حکم

اسلام آباد ہائیکورٹ نے چیئرمین پاکستان ٹیلی کمیو نیکیشن اتھارٹی( پی ٹی اے) میجر جنرل (ریٹائرڈ) حفیظ الرحمٰن کو عہدے سے ہٹانے کا حکم دے دیا۔ 

تفصیلات کے مطابق اسلام آباد ہائیکورٹ کے جسٹس بابر ستار نے چیئرمین پی ٹی اے کو عہدے سے ہٹانے کی درخواست پر  فیصلہ جاری کیا۔

دوران سماعت عدالت نے اس حوالے سے  99 صفحات پر مشتمل محفوظ فیصلہ جاری کرتے ہوئے چیئرمین پی ٹی اے میجر جنرل (ریٹائرڈ) حفیظ الرحمٰن کو عہدے سے ہٹانے کا حکم دیا۔

عدالتی فیصلے میں جسٹس بابر ستار نے فیصلے میں کہا کہ چیئرمین پی ٹی اے کی تعیناتی قانونی طور پر درست نہیں ، انہیں فوری عہدے سے ہٹایا جائے۔ 

عدالتی حکم میں کہا گیا ہےکہ پی ٹی اے میں سینئر ممبر کو عارضی طورپر چیئرمین تعینات کیا جائے۔

واضح رہے کہ میجر جنرل (ر) حفیظ الرحمان کی بطور چیئرمین پی ٹی اے تقرری کا فیصلہ مئی 2023 میں وزیراعظم شہباز شریف کی سربراہی میں ہونے والے وفاقی کابینہ کے اجلاس میں کیا گیا تھا۔