ٹرمپ کی دھمکی کے بعد امریکا،ایران کشیدگی میں اضافہ:سربیا اور سویڈن کاشہریوں کو ایران چھوڑنے کا حکم

ویب ڈیسک: ٹرمپ کی حالیہ دھمکی کے بعد مشرقی وسطی میں ایران اور امریکا کے مابین کشیدگی میں اضافہ دیکھنے کو آیا ہے جس کے بعد سربیااور سویڈن نے اپنے شہریوں کو ایران چھوڑنے کا حکم دے دیا ہے۔

غیر ملکی خبر رساں ادارے کے مطابق سربیا نے ایران میں مقیم اپنے شہریوں کیلئے ہنگامی ٹریول ایڈوائزری جاری کر دی ہے۔

اس حوالے سے سربین وزارت خارجہ کا کہنا ہے کہ سربین شہری جلد از جلد ایران سے نکل جائیں، خطے کے حالات کسی بھی وقت بگڑ سکتے ہیں، وزارت خارجہ نے کہا کہ شہریوں کی حفاظت اسی میں ہے کہ وہ ایران میں اپنا قیام ختم کرکے محفوظ مقامات پر منتقل ہو جائیں۔

اسی طرح سویڈن نے بھی اپنے شہریوں کو فوری طور پر ایران چھوڑنے کی ہدایت کر دی ہے، سویڈش وزیر خارجہ نے کہا کہ ایران اور خطے کی صورتحال غیر یقینی ہے۔

سویڈیش حکام کام مزید کہناتھا کہ ہمارے شہری موقع ملتے ہی ایران چھوڑ دیں، ان کا کہنا تھا کہ ایران میں رہنے کا فیصلہ کرنے والے اپنی حفاظت کے ذمہ دار ہوں گے۔

دوسری جانب امریکی صدر ڈونلڈ ٹرمپ نے ایران کو 10 سے 15 دن کا الٹی میٹم دیتے ہوئے کہا ہے کہ اگر نیوکلیئر معاہدہ نہ کیا گیا تو اسے سنگین نتائج بھگتنا ہوں گے۔ ایئرفورس ون طیارہ میں میڈیا سے گفتگو کرتے ہوئے صدر ٹرمپ نے خبردار کیا کہ ایران کو چاہیے کہ وہ دس یا پندرہ دن میں معاہدہ کر لے، اور کہا کہ ایران کسی صورت ایٹمی ہتھیار نہیں رکھ سکتا۔

خیال رہے کہ گزشتہ روز صدر ٹرمپ نے بورڈ آف پیس کے پہلے اجلاس سے خطاب کے دوران بھی ایران سے کہا کہ وہ امریکہ کے ساتھ ایک مؤثر معاہدہ کرے۔