کانگو وائرس سے بچاؤ کیلئےخیبرپختونخوا کے ہسپتالوں میں الرٹ جاری

پشاور:کانگو وائرس کےپھیلاؤ سے بچاؤ کیلئے خیبرپختونخوا کے ہسپتالوں میں الرٹ جاری کردیا گیا۔

تفصیلات کے مطابق صوبائی محکمہ صحت کی جانب سے جاری ایڈوائزری میں عید قربان سے پہلےکانگووائرس سے بچاؤ کیلئے اقدامات کی ہدایت کی گئی ہے۔

جاری کر دہ ایڈوائزری میں عوام کومویشیوں کے ساتھ احتیاط برتنےکا مشورہ دیاگیاہے،طبی عملے کو پی پی ای اورانفیکشن کنٹرول پروٹوکول پر عمل لازمی قراردیاگیاہے جبکہ مشتبہ کیسز کے نمونے ٹرپل پیکجنگ کے ذریعے لیبارٹری بھجوانے کی ہدایت کی گئی ہے۔

ایڈوائزری میں مویشیوں میں وائرس کی روک تھام کے لیے ٹِک کنٹرول پر زور دیا گیاہے،کانگو وائرس کی تشخیص کے لیے پی سی آر اور ایلیسا ٹیسٹ کی منظوری بھی دی گئی ہے۔

اس حوالے سےصوبائی محکمہ صحت کا کہنا ہے کہ مویشی پالنے والے افراد اور قصاب حضرات سی سی ایچ ایف کے زیادہ خطرے میں ہیں،سی سی ایچ ایف وائرس متاثرہ خون اورجسمانی رطوبتوں سےمنتقل ہوتا ہے،شہری غیر محفوظ گوشت اور بیمار جانوروں سے دور رہیں۔

جاری کر دہ ایڈوائزری کے مطابق ٹک (چیچڑ) کے کاٹنے سے سی سی ایف ایچ پھیلنے کا خدشہ ہے،مویشیوں کو ذبح کرنے سے قبل ادویات اور معائنہ لازمی قرار دینے کی تجویز بھی دیدی گئی ہے۔