پٹرولیم مصنوعات میں اضافے کے بعد گڈز اورپبلک ٹرانسپورٹرز نے بھی کرایوں میں اضافہ کردیا

لاہور: وفاقی حکومت کی جانب سے پٹرولیم مصنوعات میں اضافے کے بعد پنجاب سمیت ملک بھر ٹرانسپورٹرز مالکان کرایوں میں یکدم اضافہ کر دیا جس سے مسافروں اور شہریوں کو شدید مشکلات کا سامنا کرنا پڑ رہا ہے۔

تفصیلات کے مطابق صدر پاکستان گڈز ٹرانسپورٹ الائنس ملک شہزاد اعوان نے پٹرولیم مصنوعات کی قیمتوں میں اضافے پر بیان دیتے ہوئے کہا کہ پٹرولیم مصنوعات کی قیمتوں میں اضافے کی پاکستان بھر کے ٹرانسپورٹرز مذمت کرتے ہیں۔

ملک شہزاد اعوان نے کہا کہ پٹرولیم مصنوعات کی قیمتیں بڑھنے پر 10 فیصد گڈز ٹرانسپورٹ کے کرائے بڑھانے کا اعلان کرتے ہیں۔

انہوں نےمزید کہا کہ مسلسل پٹرولیم مصنوعات کی قیمتوں میں اضافے سے ملک میں مہنگائی بڑھ رہی ہے، وفاقی حکومت کی غلط پالیسیوں کی وجہ سے لاکھوں لوگ بیروزگار ہورہے ہیں۔علاوہ ازاں انہوںنے موٹروے پولیس ٹریفک پولیس سمیت سارے چلان ختم کرنے کا بھی مطالبہ کیا۔

دوسری جانب پبلک ٹرانسپورٹرزنے بھی پبلک ٹرانسپورٹ کے کرائے 5  سے 10فیصد بڑھانے کا اعلان کیا اور اطلاق آج سے کر دیا ہے۔
خیال رہے کہ گزشتہ رات وفاقی حکومت کی جانب سے پٹرولیم مصنوعات پر عائد لیوی میں مزید اضافہ کیا گیا جس کے باعث پٹرول اور ڈیزل 26،26 روپے مہنگا ہو گیا۔

اس حوالے سے وزارت خزانہ کی جانب سے نوٹیفکیشن جاری کر دیا ہے ، جس کے مطابق حالیہ اضافے کے بعد پٹرول کی قیمت380 اور ڈیزل کی نئی قیمت 393 روپے مقرر کی گئی ہے۔