حکومت ملک بھر میں ڈیجیٹل رسائی اور رابطہ کاری کے فروغ کے لیے کوشاں ہے، صدر مملکت

اسلام آباد:صدر آصف علی زرداری نے کہا ہے کہ آج ڈیجیٹل نیٹ ورکس تعلیم، صحت، تجارت، بینکاری اور عوامی خدمات کے لیے بنیادی ضرورت بن چکے ہیں۔

تفصیلات کے مطابق ٹیلی کمیونی کیشن و انفارمیشن سوسائٹی کے عالمی دن کے موقع پر اپنے پیغام میں صدرِ مملکت نے کہا کہ دور دراز اور پسماندہ علاقوں میں رہنے والے شہریوں کے لیے یہ رابطہ کاری اب معاش اور معلومات تک رسائی کا اہم ذریعہ بن گئی ہے۔

انہوں نے پاکستان کی ٹیلی کمیونی کیشن کمیونٹی اور اُن تمام افراد کو مبارکباد پیش کی جو ملک کے ڈیجیٹل انفراسٹرکچر کو مضبوط بنانے کے لیے خدمات انجام دے رہے ہیں۔

صدر آصف علی زرداری نے کہا کہ پاکستان کا ٹیلی کمیونی کیشن شعبہ قومی ترقی میں نمایاں کردار ادا کر رہا ہے۔ مالی سال 2024-25 کے دوران اس شعبے میں 838 ملین امریکی ڈالر کی سرمایہ کاری ہوئی جبکہ اس نے 1,075 ارب روپے کی آمدن پیدا کی۔

انہوں نے کہا کہ مارچ 2026 میں پاکستان کے IMT/5G اسپیکٹرم آکشن کی کامیاب تکمیل ملک کے ڈیجیٹل مستقبل کی جانب ایک اہم پیش رفت ثابت ہوئی۔

صدر مملکت نے کہا کہ یونیورسل سروس فنڈ کے ذریعے براڈبینڈ اور وائس سروسز لاکھوں ایسے افراد تک پہنچائی گئی ہیں جو پہلے ان سہولیات سے محروم تھے۔

 صدر آصف علی زرداری نے کہا کہ قابلِ اعتماد اور قابل دسترس رابطہ کاری مستقبل میں بھی معاشی ترقی، عوامی خدمات اور تمام پاکستانیوں کے لیے بہتر مواقع تک رسائی کے لیے ناگزیر ہے۔