ایران امریکہ مذاکرات میں ثالثی کا کردار،صدر مسعود پزشکیان کے دورہ پاکستان کا امکان 

ویب ڈیسک:ایران اور امریکہ کے مابین مذاکرات میں کامیاب ثالثی کا کردار ادا کرنے پر ایرانی صدر مسعود پزشکیان کا منگل کے روز پاکستان کا ایک روزہ دورے کا امکان ہے۔

اس حوالے سے ذرائع کا کہنا ہے کہ ایران اور امریکا کے درمیان مفاہمت کے بعد یہ ایرانی صدر کا پہلا غیر ملکی دورۂ ہوگا۔

ذرائع کے مطابق دورے کے دوران ایرانی صدر مسعود پزشکیان کی صدر آصف علی زرداری اور وزیراعظم شہباز شریف سے ملاقات متوقع ہے،ملاقاتوں میں امن مذاکرات اور خطے کی صورت حال پر تبادلہ خیال کیا جائے گا۔

ذرائع نے بتایا ہے کہ ایران امریکا جنگ کے دوران پاکستان کی جانب سے ادا کیے گئے کردار اور سفارتی کوششوں پر اظہارِ تشکر کے لیے ایرانی صدر پاکستان کا دورۂ کر رہے ہیں۔

تاہم اس حوالے سے ایرانی صدر کے دورے سے متعلق پاکستان یا ایران کا سرکاری اعلان سامنے نہیں آیا ہے۔

خیال رہے کہ ایرانی صدر کے دورۂ پاکستان سے قبل سوئٹزرلینڈ کے شہر برگن اسٹاک میں امریکا اور ایران کے درمیان امن مذاکرات ہوئے جہاں بات چیت کا پہلا دور کامیابی سے پورا ہوا۔اس اجلاس کو ’لیک لوسرن سمٹ‘ کا نام دیا گیا تھا، جس میں امریکا، ایران، پاکستان اور قطر کے بڑے لیڈروں نے بات چیت کی اور خطے میں جاری کشیدگی اور لڑائی کو ختم کرنے کے لیے کئی بڑے فیصلے کیے گئے۔