وزیرِ دفاع کی پاکستان تحریک انصاف کو میثاقِ جمہوریت پر دستخط کرنے کی دعوت

وزیرِ دفاع خواجہ آصف نے پاکستان تحریکِ انصاف کو میثاقِ جمہوریت پر دستخط کرنے کی دعوت دی ہے۔

انہوں نے آج قومی اسمبلی میں قائدِ حزبِ اختلاف کی تقریر کے بعد اظہارِ خیال کرتے ہوئے یاد دلایا کہ مسلم لیگ (ن) اور پاکستان پیپلز پارٹی نے ماضی سے سبق سیکھتے ہوئے جمہوریت اور پارلیمانی روایات کو مضبوط بنانے کیلئے میثاقِ جمہوریت پر اتفاق کیا تھا۔

وزیرِ دفاع نے بھارت کے غیر قانونی زیرِ قبضہ جموں و کشمیر کے عوام کی قربانیوں کو اجاگر کرتے ہوئے کہا کہ کشمیری عوام اپنی جانوں کا نذرانہ پیش کرکے پاکستان سے اپنی محبت اور وابستگی کا اظہار کررہے ہیں۔

وزیراعظم کے مشیر برائے سیاسی امور رانا ثناء اللہ نے اس تاثر کو مسترد کر دیا ہے کہ آزاد جموں و کشمیر کی صورتحال کو مذاکرات اور جمہوری طریقے سے حل کرنے کی کوئی کوشش نہیں کی گئی۔

قومی اسمبلی میں جمعیت علمائے اسلام (ف)کے سربراہ فضل الرحمن کے بیان کا جواب دیتے ہوئے انہوں نے اس بات پر زور دیا کہ جوائنٹ ایکشن کمیٹی کے 38مطالبات پر تفصیلی مذاکرات کیے گئے اور ہر مطالبے پر پیش رفت ہوئی تھی۔

رانا ثنا اللہ نے بجلی کے نرخوں اور گندم کے حوالے سے دی جانے والی رعایتوں کا بھی ذکر کیا۔

انہوں نے کہا کہ ہم نے بڑے ہسپتالوں میں ایم آر آئی مشینوں کی فراہمی کا مطالبہ بھی پورا کیا ہے، جبکہ بجلی کی ترسیلی سہولتوں کی بہتری کے لیے فنڈز بھی فراہم کیے گئے ۔

انہوں نے آزاد جموں و کشمیر کی ترقی اور وہاں کے عوام کی فلاح و بہبود کیلئے حکومتی عزم کا اظہار کیا۔

جے یو آئی(ف) کے سربراہ کی جانب سے ثالثی کی پیشکش کا خیر مقدم کرتے ہوئے انہوں نے کہا ایکشن کمیٹی کو پہلے لانگ مارچ کی کال واپس لینی چاہیے۔

اس موقع پر پاکستان پیپلز پارٹی کے چیئرمین بلاول بھٹو زرداری نے بھی آزاد کشمیر کی حکومت اور مظاہرین کے ساتھ مذاکرات کی ضرورت پر زور دیا۔

انہوں نے اسلام آباد اور پنجاب سمیت پورے ملک میں بلدیاتی انتخابات کرانے کا مطالبہ بھی کیا۔