لاہور چیمبر کی ایکسپورٹ کمیٹی نے ایک سالہ کارکردگی پیش کردی

لاہور: لاہور چیمبر آف کامرس اینڈ انڈسٹری کی اسٹینڈنگ کمیٹی برائے ایکسپورٹ نے اپنی ایک سالہ کارکردگی پیش کرتے ہوئے پاکستان کی معاشی ترقی کے لیے برآمدات میں اضافے اور کاروباری برادری کے ساتھ حکومتی مشاورت کو ناگزیر قرار دیا ہے۔

کمیٹی کے چیئرمین میاں شعیب بٹالوی نے پریس کانفرنس سے خطاب کرتے ہوئے کہا کہ پاکستان کی معاشی ترقی کا انحصار برآمدات بڑھانے پر ہے، اس لیے حکومت کو پالیسی سازی میں بزنس کمیونٹی کو اعتماد میں لینا چاہیے۔ انہوں نے کہا کہ برآمدات میں اضافے اور نئے ایکسپورٹرز کی حوصلہ افزائی کے لیے حکومت اور کاروباری برادری کے درمیان مؤثر رابطہ ضروری ہے۔

میاں شعیب بٹالوی نے کہا کہ نوجوانوں کو صرف ملازمتوں تک محدود رکھنے کے بجائے انہیں عالمی سطح کے ایکسپورٹرز بنانا وقت کی اہم ضرورت ہے۔ پاکستان کی معیشت کو مضبوط بنیادوں پر استوار کرنے کے لیے نوجوانوں کو عالمی مارکیٹ کے تقاضوں، بین الاقوامی تجارت اور برآمدی کاروبار سے روشناس کرانا ہوگا۔

انہوں نے بتایا کہ پاکستان اسکول آف ایکسپورٹ نوجوانوں کو بین الاقوامی تجارت، کسٹمز اور لاجسٹکس کے شعبوں میں عملی تربیت فراہم کر رہا ہے۔ ان کے مطابق یہ ادارہ نوجوانوں کو عالمی مارکیٹ تک رسائی کے لیے تیار کرنے کا ایک منفرد پلیٹ فارم ہے۔

انہوں نے کہا کہ پاکستان کی برآمدی معیشت کو وسعت دینے کے لیے نئے اور باصلاحیت ایکسپورٹرز تیار کرنا ضروری ہے، جبکہ حکومت اور نجی شعبے کی مشترکہ کوششوں سے برآمدات کے نئے مواقع پیدا کیے جا سکتے ہیں۔

پریس کانفرنس کے شرکاء نے کہا کہ نوجوانوں کو عالمی مارکیٹ سے جوڑ کر پاکستان کی ایکسپورٹ اکانومی کو مزید مضبوط بنایا جا سکتا ہے۔ انہوں نے اس بات پر زور دیا کہ پاکستان کو مضبوط ایکسپورٹ اکانومی بنانے کے لیے حکومت، بزنس کمیونٹی اور تعلیمی و تربیتی اداروں کے درمیان مربوط اور مشترکہ کوششیں وقت کی اہم ضرورت ہیں۔

پریس کانفرنس میں لاہور چیمبر کے نائب صدر خرم لودھی، حسن سپرا، ڈاکٹر افضل، حمزہ ندیم، آمنہ، مختلف ایکسپورٹرز اور پاکستان اسکول آف ایکسپورٹ کے طلبہ نے شرکت کی۔