مکہ دفاعی اتحاد کے پہلے سیکریٹری جنرل کا تعلق پاکستان سے ہوگا، حاقان فیدان

پاکستان، سعودی عرب اور ترکیہ کے درمیان سہ فریقی معاہدے کا باضابطہ نام مکہ دفاعی اتحاد ہوگا اور اس کے پہلے سیکریٹری جنرل کا تعلق پاکستان سے ہوگا۔

یہ اعلان ترکیہ کے وزیر خارجہ حاقان فیدان نے آج استنبول میں صحافیوں کو بریفنگ کے دوران کیا۔

انہوں نے کہا کہ اتحاد کا سیکریٹریٹ ریاض میں قائم کیا جائے گا۔

حاقان فیدان نے کہا کہ مکہ دفاعی اتحاد کو علاقائی امن، سلامتی، استحکام اور خوشحالی کے فروغ کے لیے ادارہ جاتی شکل دی جائے گی۔

انہوں نے کہا کہ یہ اتحاد دفاع اور بین الاقوامی قانون کے اصولوں پر مبنی ہے، جن میں ممالک کی خودمختاری اور علاقائی سالمیت کا احترام اور اندرونی معاملات میں عدم مداخلت شامل ہیں۔

حاقان فیدان نے کہا کہ یہ اتحاد کسی خاص ملک کے خلاف نہیں ہے اور ان اصولوں کی پاسداری کرنے والے دوست ممالک اس میں شامل ہو سکتے ہیں۔

انہوں نے کہا کہ مکہ دفاعی اتحاد ان دیگر اتحادوں کی تکمیل کرے گا جن میں رکن ممالک شامل ہیں اور یہ علاقائی امن و سلامتی کے لیے ان کے عزم کی عکاسی کرتا ہے۔