آرمی چیف کا روس کے ساتھ سکیورٹی تعاون بڑھانے کے عزم کا اعادہ

راولپنڈی: چیف آف آرمی سٹاف اور چیف آف ڈیفنس فورسز فیلڈ مارشل سید عاصم منیر نے روس کے ساتھ دیرینہ تعلقات مزید مستحکم کرنے اور مشترکہ دلچسپی کے شعبوں، بالخصوص سکیورٹی کے شعبے میں عملی تعاون کو وسعت دینے کیلئے پاکستان کے عزم کا اعادہ کیا ہے۔

وہ آج روسی فیڈریشن کے وزیر داخلہ ولادیمیر KOLOKOLTSEV سے گفتگو کر رہے تھے، جنہوں نے بدھ کے روز جنرل ہیڈ کوارٹرز راولپنڈی میں ان سے ملاقات کی۔

ملاقات کے دوران فریقین نے باہمی دلچسپی کے امور اور علاقائی سکیورٹی کی صورتحال پر تبادلہ خیال کیا، جس میں دوطرفہ سکیورٹی تعاون کو مضبوط بنانے پر خصوصی توجہ دی گئی۔

انہوں نے پاکستان اور روس کے سکیورٹی اداروں کے درمیان قریبی ادارہ جاتی اور بہتر روابط کی اہمیت پر زور دیا ۔

روس کے وزیر داخلہ نے علاقائی امن و استحکام کیلئے پاکستان کی خدمات کو سراہا اور دہشت گردی کے خلاف جنگ میں پاکستان کی مسلح افواج کی پیشہ ورانہ صلاحیتوں اور قربانیوں کا اعتراف کیا۔