پارلیمنٹ کے مشترکہ اجلاس میں خیبرپختونخوا میں ایمرجنسی اور گورنر راج کے نفاذ کی توثیق کردی گئی

پارلیمنٹ کے مشترکہ اجلاس میں خیبرپختونخوا میں ایمرجنسی اور گورنر راج کے نفاذ کی توثیق کردی گئی۔

جلاس کے آغاز میں پشاور میں سکول کی چھت گرنے سے جاں بحق ہونے والوں کے ایصال ثواب کیلئے فاتحہ خوانی کی گئی۔

بعد ازاں وزیر پارلیمانی امور طارق فضل چوہدری نے خیبر پختونخوا میں ایمرجنسی کے نفاذ اور گورنر راج سے متعلق گیارہ اکتوبر کو جاری کیے گئے صدارتی اعلانات کی منظوری کیلئے پارلیمنٹ کے مشترکہ اجلاس میں دو قراردادیں پیش کیں۔

اپنے خطاب میں وزیر قانون اعظم نذیر تارڑ نے صدارتی اعلانات کی پارلیمنٹ کے مشترکہ اجلاس سے منظوری کی آئینی ضرورت کو اجاگر کیا۔

انہوں نے کہا کہ قومی اسمبلی اور سینیٹ نے گزشتہ روز آئین کے مطابق خیبر پختونخوا میں ایمرجنسی کے صدارتی اعلان کی منظوری دی۔

وزیر قانون نے کہا کہ صوبے میں سکیورٹی کی سنگین صورتحال اور اس چیلنج سے نمٹنے میں صوبائی حکومت کی ناکامی کے پیش نظر ایمرجنسی کا فیصلہ آخری حل کے طور پر کیا گیا ہے۔

پیپلز پارٹی کی رہنما شیری رحمان نے اظہار خیال کرتے ہوئے دہشت گردی کے ناسور کے خلاف جنگ کے لیے زیادہ اتحاد و یکجہتی کی ضرورت پر زور دیا۔

وزیر امور کشمیر و گلگت بلتستان انجینئر امیر مقام نے کہا کہ یہ بات ریکارڈ کا حصہ ہے کہ مرکز میں اپنے دور حکومت کے دوران پی ٹی آئی نے دہشت گردوں کے خلاف موقف میں نرمی اختیار کی۔

انہوں نے کہا کہ خیبر پختونخوا میں موجودہ انتظام اس وقت تک برقرار رہنا چاہیے جب تک صوبے میں مکمل طور پر امن بحال نہیں ہو جاتا۔