مینارپاکستان واقعہ: ڈی آئی جی آپریشنز ، ایس ایس پی آپریشنز اورمتعلقہ ایس پی کو عہدے سے ہٹادیاگیا

تفصیلات کے مطابق وزیراعلیٰ پنجاب سردار عثمان بزدارکی زیر صدارت اعلی سطح کا اجلاس ہوا جس میں وزیراعلیٰ عثمان بزدا ر نے  مینار پاکستان پر خاتون سے دست درازی اور لاہور میں گزشتہ دنو ں میں پیش آنے والے بعض واقعات پر سخت تشویش اور کااظہارکیا ۔ وزیراعلیٰ پنجاب  عثمان بزدار کی ہدایت پر  ڈی آئی جی آپریشنز، ایس ایس پی آپریشنز اور ایس پی کو عہدے سے ہٹا دیاگیاہے ۔ دونوں افسران کو  سی پی او آفس رپورٹ کرنے کی ہدایت کی گئی ہے۔ رسپانس میں تاخیر اور فرائض سے غفلت برتنے پر ڈی ایس پی او اور ایس ایچ او لاری اڈہ کو معطل کردیا گیا ہے  جبکہ گریٹر اقبال پارک کے پراجیکٹ ڈائریکٹر اور ڈپٹی ڈائریکٹر بھی معطل کردئیے گئے ۔

وزیراعلی پنجاب  عثمان بزدارخاتون کے واقعہ اور دیگر واقعات پر پولیس کے ردعمل میں تاخیراور فرائض سے غفلت برتنے پر برہمی کا اظہار کرتے ہوئے کہاکہ خاتون سے دست درازی اور دیگر واقعات کے حوالے سے پولیس کا ردعمل سست رہا ہے ،عوام کو پولیس سے بہت توقعات ہیں اور پولیس کو عوامی امنگوں کے مطابق فرائض سرانجام دینا ہیں ۔

اس حوالے سے پنجاب حکومت کے ترجمان فیاض الحسن چوہان  کاکہناہے  کہ لاہور گریٹر اقبال پارک واقعے میں اب تک بیس سے زائد ملوث ملزمان کو گرفتار کیا جا چکا ہے۔ پنجاب پولیس نادرا، پنجاب فرانزک سائنس ایجنسی کی مدد سے بقیہ ملزمان کو ٹریس کر رہی ہے۔ ملوث ملزمان کے خلاف مقدمہ میں دفعہ 354- اے (ت پ) کے تحت کاروائی کی جا رہی ہے۔ تعزیرات پاکستان کی دفعہ 354-اے میں سزا عمر قید یا سزائے موت ہے۔انہوں نے کہا کہ معاشرے کی اجتماعی بہتری کے لیے ایسے کیسز کو جلد انجام تک پہنچانا بہت ضروری ہے۔

واضح رہے کہ لاہور میں مینارِ پاکستان کے گریٹر اقبال پارک میں خاتون ٹک ٹاکر عائشہ اکرم کو ہراسگی اور بدتمیزی کا نشانہ بنانے کا واقعہ 14 اگست کے روز پیش آیا تھا۔یومِ آزادی کے موقع پر خاتون ٹک ٹاکر عائشہ اکرم سے ہوئی دست درازی کا خوفناک واقعہ 3 روز بعد سوشل میڈیا کے ذریعے سامنے آیا۔سینکڑوں نوجوانوں نے ٹک ٹاکر عائشہ اکرم اور اس کے ساتھیوں کو تشدد کا نشانہ بنایا اور کپڑے پھاڑ دیئے ۔