آرمی چیف سے وزیراعظم آزاد کشمیر کی ملاقات

پاک فوج کے شعبۂ  تعلقاتِ عامہ (آئی ایس پی آر) کے مطابق آرمی چیف جنرل قمر جاوید باجوہ اور وزیرِ اعظم آزاد جموں و کشمیر سردار عبدالقیوم نیازی نے ملاقات کے دوران لائن آف کنٹرول کی صورتِ حال پر تبادلہ خیال کیا۔

آرمی چیف جنرل قمر جاوید باجوہ نے کشمیریوں کے حقِ خودارادیت کے لیے کشمیری بزرگ رہنما سید علی گیلانی کو خراجِ عقیدت بھی پیش کیا۔ پاک فوج کے سربراہ جنرل قمر جاوید باجوہ نے کہا کہ سید علی گیلانی نے کشمیریوں  کے حق خودارادیت کیلئے زندگی بھر بے لوث جدوجہد جاری رکھی۔

آرمی چیف  نے وزیراعظم آزاد جموں و کشمیر کو یقین دہانی کروائی کہ پاک فوج کشمیر کاز کے ساتھ پرعزم کھڑی ہے، اور کشمیری عوام کی بھرپور حمایت جاری رکھے گی ۔ آرمی چیف نے  خطہ کشمیر کے استحکام کیلئے نیک خواہشات کا اظہار کیا ۔

آئی ایس پی آر کے مطابق آرمی چیف جنرل قمر جاوید باجوہ نے عبدالقیوم نیازی کو آزاد جموں و کشمیر کی وزارتِ عظمیٰ کا منصب سنبھالنے پر مبارک باد دی۔  آئی ایس پی آر کے مطابق سردارعبدالقیوم نیازی نے  آزادجموں وکشمیرمیں سیکورٹی وترقی کیلئے پاک فوج کے کردار کو سراہا۔