وزیرداخلہ  نے کورونا ویکسین نہ لگوانے والوں  کو خبردار کردیا 

تفصیلات کے مطابق وفاقی وزیر داخلہ شیخ رشید نے کورونا سے متعلق قوم کو پیغام دیتے ہوئے کہا ہے کہ این سی او سی نے کورونا کیخلاف زبردست کام کیا ہے، این سی او سی کے کام کو دنیا تسلیم کرتی ہے۔ شیخ رشید  نے قوم سے کورونا ویکسین لگوانے کی اپیل کرتے ہوئے  کہا کہ 30 ستمبر تک  کورونا ویکسین کی دوسری ڈوز  بھی لگوا لیں ، 30 ستمبر کے بعد مختلف قسم کی پابندیاں لگنے جا رہی ہیں۔جنہوں نے ویکسین نہیں لگوائی وہ 30 ستمبر کے بعد بہت سی سہولیات سے محروم ہو جائیں گے ، اپنے لیے اپنے ملک کیلیے ویکسین لگوائیں۔

وفاقی وزیر داخلہ شیخ رشید نے کہا ہے کہ 30 ستمبر سے پہلے پہلے ویکسین کی  دونوں ڈوز مکمل کر کے اپنے خاندان اور اولاد  کو بچائیں اور ملک کی خدمت کریں۔

واضح رہے کہ ملک بھر میں کورونا ویکسی نیشن کا عمل جاری ہے ،  گزشتہ روز 7 لاکھ 05 ہزار 853 افراد کو کورونا ویکسینز لگائی گئیں۔ این سی او سی کے اعداد وشمار کے مطابق پاکستان میں کورونا ویکسین کی 7 کروڑ 74 لاکھ 37ہزار 397 خوراکیں لگ چکی ہیں ۔ 

دوسری جانب گزشتہ 24 گھنٹوں کے دوران ملک میں کورونا وائرس سے مزید 42افراد انتقال کر گئے جبکہ 2ہزار 060 کیسز رپورٹ ہوئے ہیں۔   ملک میں  اموات کی مجموعی تعداد27ہزار524 ہوگئی ہے،جبکہ  متاثرہ افراد کی مجموعی تعداد 12لاکھ36ہزار888 تک پہنچ گئی ہے۔  این سی اوسی کے مطابق ملک میں کورونا کے فعال کیسز کی تعداد52ہزار042ہوگئی جبکہ گزشتہ 24گھنٹوں میں کوروناکے44ہزار980ٹیسٹ کئےگئے ۔